Shillong, Risaw 23
Ki khynnah ka Mawkma Sports Club ki la ïoh rah ïa ka nam lahduh ha ka U-14 Football Tournament ba la pynïaid da ka Marai-kaphon Youth Club (MY-C), kaba don ruh hapdeng ka jingrakhe ïa ka jubili ksiar ne ka jingdap 50 snem ïa ka jingseng jong kane ka synjuk, da kaba pynliem da 1-0 kol ïa ka Seng Samla Khliehshnong.
Kumban shu pynkynmaw ba ha kane ka sien ka kynti kaba mynta, na ka liang ki nongkitkam ka Maraikaphon Youth Club, ki la shim biang ïa la ka jong ka sien jam ban pynlong ïa ka lympung ïaleh-kai phutbol ba kyrpang ïa ki khynnah kiba dang rit, kaba long kum shi bynta ban lah ban sei ne ban ïa-rap pynpaw pyrthei ïa ka sap barieh kaba ki hep barit ka thaiñ Sohra ba ki don ha ka phutbol.
Kum ka shnong kaba bna nam tam ha kane ka jylla, ka Sohra ka dei ruh kaba la lah ba kan sei na la u sup u thiar u jong ka ïa kiba bun ki rangïalehkai kiba kynsai kiba ka jingim ïalehkai ka jong ki kam shym la shu kut noh tang ha la shnong, pynban ki da ïai bteng wat ban da lah ban ïoh ban mihkhmat ïa ka jylla ne wat ïa ki klob ïalehkai kiba ym dei shuh tang ïa ki klob ka nongbah Shillong hynrei ïa ki klob ïalehkai ba paw bad ba radbah jong ka India.
Ha kane ka kynti na ka liang ka Maraikaphon Youth Club, ka la lah ba kan pynlong ïa kane ka lympung ba wan ïashim bynta da 23 tylli ki klob ne ki kynhun da ka jingïarap pisa lyngba ka District Sports Promotion Scheme kaba wan lyngba ka ophis Deputy Commissioner ka East Khasi Hills District bad ba la pdiang ne ithuh ïa ka da ka ophis ka jong u District Sports Officer ka East Khasi Hills District.
Ïa ka final jong kane ka lympung la lah ban pynlong ha ka sngi Saitjaiñ ka taiew kaba la dep, kata ka 21 tarik, ha kaba ki paidbah nongwan kyrshan naduh ki longkmie, ki longkpa, ki khun samla ki la wan ban pynshongshit bad ban ai mynsiem ïa ki hep barit jong kine ki artylli ki kynhun ba la mih madan ban ïaknieh rah ïa ka nam kum ka lahduh.
Haba phai sha ka jing-ïakhun ka kylla jong ka shiteng kynta ba la pynïa-lehkai, ka la kut shwa ha kaba khlem shym don mano mano ba ïoh ban pynkhih ïa ka jar, kampher wat ki hep barit jong ba-roh ar kyrhun, ki la buh thong na ka bynta ban ïakhun ban ïoh pynkhih ïa ka jar.
Pynban 5 minit hadien ba la sdang ïa ka kylla miet, ka Mawkma ka la ïoh ban pynkhih jar lyngba ka kol ba la thep da u Widney Kharumni, kaba la pynsawa jam ïa ka madan lyngba ka jingkynhoi bad risa jong ki nongkyrshan ka Mawkma.
Ïa ka final la wan sakhi bad pynshit pynshngain da u Bah Evan Maxwell Basaiawmoit, President ka Sohra Sports Association kum u kongsan, u Bah Sunesh Syiem Secretary ka MFA, Pa’iem Freeman Sing Syiem, Syiem ka Hima Sohra, u SDPO ka Sohra Civil Sub Division Bah Pynhun Syiem, u Bah A Khongsit, OC ka Sohra, Fr. A Rongrin SDB, Principal St John Bosco Boys Hr. Sec School, Sohra, Bah Ethel-bert Sawian Rangbah Shnong Maraikaphon, Bah Favian Umdor Secre-tary Shnong Maraika-phon, Shemborlang Khar-wanlang Rangbah Shnong Khliehshnong, Bah Allan West, President, Secretary Seng Longkmie Maraika-phon, ki dkhot ka MYC hapoh ka jingïalam u Bah Jasper Iangrai President MYC u Bah Carolus W Shabong Secretary bad kiwei kiwei.
Ha kaba kut ka jingïa-khun ka la don ka jingsam ïa ki khusam ha kaba la sam ruh ïa ki khusnam shimet, kaba mynta ka kynti ka nam nongïalehkai ba kynsai ha ka final ka la leit sha u Mom Mesasu-kher Lyndem na ka Seng Samla Khliehshnong, nongap kol ba kynsai (Best Goalkeeper) sha u Romius Swer na ka Seng Samla Khliehshnong, nongïaleh-kai ba kynsai ha ka lympung baroh kawei (Player of the tournament) ka leit sha u Banshanbor Nong-rum jong ka Laitryngew Sport Club.
Kumban shu pynkynmaw biang ba ha ka snem ka ban wan ka Maraika-phon Youth Club kan pynlong biang ïa kane ka lympung da kaba kan kyntiew pat sha ka kyrdan ïakhun U-15.
