Shillong, Risaw 23
U rangïalehkai kriket barim ka India, u Bishan Singh Bedi uba dei u nongkawang bol u la khlad noh ha ka rta kaba 77 snem.
U Bishan Singh Bedi, uba la long teng ruh u kapten ka India bad u nongkawang bol ba tbit, u la khlad noh ha ka sngi Nyngkong, hadien ba ka jingpang ka la bat mynta la ar snem eiei. Une u rangïalehkai u la ieh noh shadien ïa ka kurim ka Anju bad ar ngut ki khun kata ka Neha bad u Angad.
Halor ka jingkhlad noh jong une u kapten barim ka India, ka BCCI ka la phah ka khubor sngewlem bad ha kajuh ka por ban phah ruh ka jingsngewlem sha ka ïing ka sem.
U Bedi, uba la ïalehkai haduh 67 tylli ki jingïaleh-kai Tests ha ki 12 tylli ki snem na ka bynta ka India kata hapdeng u snem 1967 haduh 1979, u la long uwei na ki rangïa-lehkai ba tbit ka India ha kito ki por.
U Bedi, ryngkat u Erapalli Prasanna, BS Chandrasekhar bad u S Venkataraghavan, ki la long ki nongkawang bol (spin bowler) kiba tbit ha ka history jong ka kriket ka India, kiba la buh jingeh shi katdei ïa ki nongtied.
U Bedi uba la ïoh ruh ka khusnam Padma Shri ha u snem 1970, u la ïoh ban long kapten ïa ka India ha ki 22 tylli ki jingïalehkai Test bad ban ïalehkai ïa ka jingïalehkai ODI kaba nyngkong pyrshah ïa ka East Africa ha u snem 1975 ha kaba u la kawang 12 over, u la ai tang 6 run bad khur shi wiket.
U Bedi u la sdang ïa ka jingïalehkai test kaba nyngkong eh pyrshah ïa ka Australia ha u snem 1969-70, ha kaba u Bedi na ki 5 tylli ki tes u la khur haduh 21 tylli ki wiket. Hadien kane, kam shym la don shuh ka jingphai dien, ha kaba u la bteng ban khur wiket ha ki jingïalehkai pyrshah ïa ka England bad West Indies.
