Washïington, Risaw:
Ka tnat kam poh ïïing jong ka United States ha ka Sngi U Blei, ka la maham ïa ki paidbah nongshong shnong jong ka baroh ba kin kiar na kaba leit sha ka ri Iraq, hadien ka jingshah thombor jong ki shipai America bad katto katne ki nong US ha ki katto katne ki bynta jong ka ri.
Ha katei ka jingpynbna, ka US ka la maham ïa ki paidbah ba kin ym leit sha Iraq ha kum kane ka por namar ki jingshah rahbor, ki kam thombor, ki jingïakynad bad shibun kiwei de ki jingma kiba ap ïa ki paidbah na katei ka ri katba ka jinglong jingman hapdeng ka Us bad Iraq kam pat bïang.
Namar la ong ba ka la mih ka jingïakynad hapdeng ki shipai bad ki bor pahara ka US bad ki jong ka Iraq bad Syria naduh ba la jia ka thma hapdeng ki lehnoh Hamas bad ka Israel hapoh Gaza. Ha kaba, ha kane ka taiew ba la lah, ki jhad thma ka US ki la ioh siat pynbthei ïa bun tylli ki drone bad ki ‘namding ba la sïat da ki lehnoh Houthis na Yemen kiba la ioh jïingkyrshan na ka Iraq.
Namar la ong ba ka Iraq ka la wanrah jingma ïa ka United States ha kane ka kynti bad kumta ruh ka long kaba ap jingma ïa ki paidbah na US ban leit ban rung ban mih sha Iraq khamtam haba ka jingïakynad bad ka thma hapdeng ka Israel bad Hamas ka dang neh bad nang jur shuh shuh.
Naba la ong ruh ba ka US ka la shim khia halor ka jingma kaba ap ïa ka namar jong ka Iran bad ha kajuh ka por ruh ka la maham ïa baroh ki ri Muslim ba kim dei ban leit ai jingkyrshan ïa ka kynhun lehnoh Hamas ha ka jingïakhun pyrshah ïa ka Israel. Namar ka jingïadon kti jong ki ha katei ka thma, kan wanrah jingma ïa ka pyrthei baroh kawei bad ka lah ruh ban wanrah ïa ka thma kaba jur.
Ha kajuh ruh ka por la ong ba ka Israel ka la ther bom khlem sangeh sha Gaza bad sha kylleng ki bynta ba don ki ktem jong ki lehnoh Hamas hapoh Gaza Strip, naduh ka por hi ba ka Israel ka la pynbna ïa ka thma hadien ba ki lehnoh Hamas ki la ther da ki spah tylli ki ‘namdïing sha Israel bad kaba la shim ïa ka jïingim jong palat 1,400 ngut ki briew shisien jïa.
