Washington, Risaw:
U President ka United States, u Joe Biden bad u Myntri Rangbahduh ka Israel- u Benjamin Netanyahu ha ka jingiakren jongki ha ka Sngi U Blei, ki la ia mynjur ban phah ia ki marbam bad ki song jingiarap kaba ar ban pynpoi sha Gaza lyngba jong ka Egypt bad la ong ba kitei ki lad jingiarap kin nang iai bteng beit katba ka thma hapdeng ka Israel bad ki lehnoh Hamas ka dang iai bteng.
Kumta, ha katei ka sngi la ong ba kitei ki heh nongialam jong kine ki 2 tylli ki ri, ki la ia mynjur bad iabeit ban nang iai bteng ia ka jingphah ia ki jingiarap bad ki mar bam- mar dih naka bynta ki paidbah nongshong shnong ka Gaza, kiba la mad ia ka jingkyrduh bad kiba la kylla phetwir naduh ba khie ka thma hapdeng ki lehnoh Hamas bad ka Israel ha kine ki taiew ba la leit.
