Khliehriat, Risaw 23
Ka Chiehruphi SYW Sports Club ka la ïoh rung sha ka jingïakhun final jong ka lympung ïalehkai First Division Football Tournament ba la pynïaid da ka East Jaiñtia Hills District Football Association (EJHDFA).
Kane ka jingïoh rung final ka la wan urlong hadien ba ka Chiehruphi SYW SC ka la lah ban pynliem noh ïa ka Khliehriat West Football Club da 3-2 kol ha ka jingïakhun semi-final kaba la long ha madan Artificial Turf Diengshynrum, Khliehriat ha ka Lah Sngi U Blei mynta ka taiew.
Kane ka nam jop jong ka Chiehruphi ka la wan ruh ha ka ‘extra time’ kata hadien ba ka jingïakhun hapdeng ki arliang mamla kala kut noh ha ka jingïakhaid da mar 2-2 kol ha ka por kaba la buh.
Haba phai sha ka jingïalehkai jong ka kylla step, ka Chiehruphi SYW SC ka la ïoh ban pynkhih jar tang hapoh ka minit kaba 8 ba la thep da u Sakhiat Sympli bad ha ka minit kaba 27 ba la thep da u Bretly Nongtdu, katba ka Khliehriat West ka la lah ban pynphai ha ka minit kaba 41 lyngba ka penalty ba la thep da u Shanbor Malang bad ha ka minit ba 42 ïa kaba la thep da u Dawyoo Bhoi.
Haba bteng biang ïa ka jingïakhun ha ka kylla miet, watla ki arliang mamla ki la pyrshang katba lah ban rah ïa ka bol shakhmat da ka jingthmu ban thep sha kol hynrei haduh ba kut ka kylla miet khlem don mano mano ba ïoh pynkhih jar bad kumta la rah noh ïa ka jingïakhun sha ka extra time ha kaba ka Chiehruphi SYW SC ka la ïoh ban pynkhih jar ha ka minit kaba 99 lyngba u Suting Syrti bad kaba la biang pura ba kan khur ïa ka jingjop bad buh jaka ha ka final jong katei ka lympung.
Da kane ka nam jop, ka Chiehruphi SYW SC ka la ïoh ruh ban kiew kyrdan bad ha ka aiom ïalehkai ka ban wan kan ïalehkai noh ha ka kyrdan Super Division Football Tournament.
Ha ka 24/10/2023 ka jingïakhun semi-final kan long hapdeng ka Ladrymbai B Sports Club pyrshah ïa ka Tpepswer SSWO ha ka por 1.00 baje nohphai sngi.
