Shillong, Risaw 24
U rangapkol ka Jylla u Aibormiky Suchiang u la pynpaw ïa ka jingangnud ba un ïohi ïa ki klob na ri lum Jaiñtia ba kin ïoh ban ïashim bynta ha ki lympung ïalehkai kiba heh kum ka I-League bad Durand Club.
Kane ka jingpynpaw ka jong u ka long lyngba ka jingïai kiew shaphrang ki lympung ïalehkai phutbol ha ka thaiñ West Jaiñtia bad East Jaiñtia lyngba ka jingtrei shitom ki synjuk ïalehkai kiba lah ban pyntyllun ïa ki lympung ïalehkai man la ka aïom.
Utei u rangïalehkai uba na Dongmihsngi, Jowai, uba la ju apkol na kiba bun ki klob ka nongbah kum ka Shillong Lajong, Rangdajied United, Langsning FC bad kiwei, u la ong, “Ngam kwah ba ki klob kin kut noh tang ha ki lympung kiba hapoh Jaiñtia Hills namar ba ha kine ki ar lai snem nga ïohi ba ki klob napoh ri lum Jaiñtia kum ka Ladthalaboh Sports Club bad ka Niawasa United ki la pyrshang ban pynlut pynsep kham bun ka pisa na ka bynta ban kyntiew ïa ka phutbol.”
“Kine ki klob ki la pyrshang ban kyntiew ïa ka phutbol da kaba siew bha ïa ki rangïalehkai, ki coach kat kum ka juk ba mynta. Te kumta nga khublei ïa ka Ladthalaboh bad Niawasa ba kin nangïai bteng shuh shuh ban kyntiew ïa ka phutbol hapoh ka thaiñ namar kumba ka long mynta ka phutbol ka la long ka lad ban kamai pisa lada ngi lah ban trei shitom bad pyndonkam hok ïa la ki sap ba ngi don,” la bynrap une u rangïalehkai ha ka kyrwoh ka jong u.
“Nga da kwah shuh shuh ban mih kham bun ki klob bad nga wer ïa ki riewshimet kiba don ïa ka mynsien ban kyntiew ïa ki kam ïalehkai ba kin mihkhmat na ka bynta ban seng ïa ki klob khnang ba ka lympung ïalehkai hapoh Jaiñtia Hills kan long kaba itynnad bad ki samla jong ngi kin ïoh kam ïoh jam bad kin lait na ki jingdih kiba sniew bad kiba pyntroiñ syndon ïa ka jingim ka jong ki,” la bynrap u Aibormiki, uba la lah ruh ban pyndep ïa ka jingshah pyntbit kum u coach ha kane ka jingïalehkai.
Shuh shuh u la kyntu ruh ïa ki synjuk ïalehkai hapoh ka district bad ruh ïa ka shlem treikam jong ki District Sports Officer (DSO) ba kin pynmih shibun ki shlem ai jinghikai na ka bynta ki khynnah (grassroot training) ha baroh ki jaka.
