Shillong, Risaw 24
Watla ka la ïaid mynta la palat shi snem kynthih naduh ba ka Sorkar Jylla ka la pynpra noh ïa ka jaka ïalehkai jong ‘U Tirot Sing Indoor Stadium’ kaba don ha Lower Lachumiere (Shillong), hynrei haduh mynta ym pat ïohi dak ban pyntreikam ïa ka. Kane ka la long kum ka jingkhanglad ïa ki nongïalehkai ka Jylla ba kin pynkhreh na ka bynta ki lympung ïalehkai bapher bapher.
Ka jingpynpra ïa katei ka jaka ïalehkai ka la long naduh u Nailar jong u snem ba la dep (2022) da ka jingthmu ban tei noh da ka U Tirot Sing Bhavan ha ka jinglut kaba T. 20 klur tam.
Kumba ka long mynta naduh ba la pynpra ïa katei ka indoor stadium kaba la ïaid kumba 14 bnai, hynrei ym shym la ïohi dak eiei na ka bynta ban sdang noh ïa ka kam. Kaba sngew phylla ka long pat ba kane jaka ka la kylla long pynban ka jaka pynïeng ïa ki kali jong ki nongtrei ophis bad kiba wan donkam sha katei ka jaka.
Haba ïakren bad ki katto katne ki khynnah ki la pynpaw ïa ka jingdiaw mynsiem ban ïohi ïa ka jingleh ka Sorkar Jylla kaba khlem da pyrkhat hashwa ba kan pynpra kyrkieh ïa ka. “Ka jingkhie khohreh ban pynpra kyrkieh ïa kane ka indoor stadium ka la long ka jingduhnong kaba khraw ïa ngi ki khynnah kiba ju kilanmet mynstep bad janmiet na ka bynta ban pynkhreh ïa ki lympung ïalehkai bapher bapher.”
Kane ka indoor stadium ka long ka jaka pdeng ïa ngi ki khynnah ban wan kilanmet man la ka sngi. Ka Sorkar kam shym pyrkhat eiei ïa ngi ki nongïalehkai, hynrei ka shu khmih lynti tangba ngin wanrah jingjop ha kino kino ki lympung shabar Jylla. Nalor ba ka JN Sports Complex ka dang don hapdeng ka jingmaramot pynbha, hynrei ngi la duh sa ïa ka jaka ïalehkai ha U Tirot Sing Indoor Stadium. Ko Sorkar haei phin ai jaka ïa ngi ki nongïalehkai,” la pynpaw ki katto katne ki nongïalehkai haba ïakren bad u nongthoh khubor.
Kumba ka paw ka Sorkar ka la buh ïa ka thong ban pyndep ïa kane jingtei ha ki ar snem, hynrei ym pat ïohi dak eiei watla mynta ka la ïaid la 14 bnai kynthih naduh ba la pynpra ïa ka. “Ka Sorkar ka shu ïalehkai ban pynpra ïa kiba la tei naduh kiba myn barim khlem da lah ban buh ïa ka thong ban pyndep ha ka por kaba biang,” ki la bynrap.
Kumba ka paw hapoh kane ka indoor stadium la ju ïoh kilanmet da ki khynnah ïalehkai Badmin-ton bad Table Tennis, kumjuh ruh la ju pynlong ïa kiwei pat ki lympung ïalehkai bapher bapher kum ka karate, martial arts bad kiwei, katba ka bynta kaba shabar la ju pynlong ïa ki jingïalehkai Basketball bad kine baroh ki la long ki jingmyntoi ba khraw ïa ki nongïalehkai naduh ki por ba la leit.
Haba phai khyndiat shaphang kane ka jaka ïalehkai, la ju tip mynshwa da ka National State Council of Assam (NSCA), ïa kaba la plie nyngkong eh ïa ka da u President barim jong ka ri India u Dr. Fakrudin Ali Ahmed ha u snem 1964. Hadien ba la seng nyngkong ïa ka, la ju pynlong ïa ki lympung ïalehkai da ka jingthmu ban kyntiew ïa ka jingïalehkai badminton.
Hadien ba ka Jylla ka la ïoh ïa la ka jong ka jylla kaba pura, la ïai bteng wat ban maramot ïa ka haduh arsien arwat katta ha u snem 1984-86, bad ha u snem 1992, la shim shuh shuh ïa ka sien jam ban tei pynthymmai biang ïa ka sa shisien.
Katba ki snem ki nangïaid la ju pynlong ïa kiba bun bah ki lympung ïalehkai ym tang kiba na ka Jylla, hynrei wat ia ki lympung ïalehkai kiba dei jong ka ri kum ka Inter Table Tennis Zonal Championship u snem 1995, Junior National TT Championship bad haba phai sha ka badminton la lah ban pynlong ïa ka AG Meet.
Lyngba kane ka jaka ïalehkai ki la mih bun ki nongïalehkai kynthei bad shynrang kiba paw ha ka badminton bad table tennis.
