Jowai, Risaw 24
Ka Mukhla Evergreen ka la khur ïa ka jingjop ha ka lympung ïalehkai First Division Football Tournament (Chatister Kharkongor Memorial Trophy 2023), katba ka 7 Wasa United bad ka Khimu-sniang ki la ïasam mar shi dor-thong ha ka Super Division Football Tournament.
Ïa kine ki lympung ïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh Jowai ha ka sngi Ba-ar.
Ha ka jingïakhun jong ka First Division, ka Mukhla Evergreen ka la pynliem noh ïa ka Sabahmuswang da 2-0 kol. Ïa kine ki kol jong ka Mukhla Evergreen la thep da u Kitboklang Phawa ha ka minit kaba 33 bad u Nidaïoh Dhar ha ka minit kaba 73.
Haba phai sha ka jingïalehkai Super Divis-ion, ka jingïakhun ka la kut da ka jingïakhaid mar 1-1 hapdeng ka 7 Wasa United pyrshah ïa ka Khimusniang.
Ïa ka kol jong ka Khimusniang la thep da Lastborn Suting ha ka minit kaba 6 bad ïa ka kol jong ka 7 Wasa United la thep da u Samehi Ryngki ha ka minit kaba 72.
Ha ka 25 tarik ka jingïakhun jong ka First Division kan long hapdeng ka Moosyiem Shang -pung pyrshah ïa ka Mookyndur ha ka por 12 baje mynsngi, katba ha ka Super Division ka Mynthong pyrshah ïa ka Sailung Ïalong ha ka por 2 baje janmiet.
