Dhaka, Risaw:
Kumba 17 ngut ki briew ki la khlad noh bad 100 tam pat ki la mynsaw ha ka jingiatyngkhuh jong 2 tylli ki rel jong ka ri Bangladesh ha ka Lah Sngi U Blei, ha kaba ki heh ka Bangladesh ki la iathuh ba la ikop kumba ka jingïap na katei ka jingjia kan nang jur bad nang kiew shuh shuh.
Katei ka jingiatyngkhuh jong kitei ki 2 tylli ki rel ka la jia hapoh ka nongbah Bhairab ha kaba kawei ka rel kit mar ka la iatyngkhuh bad katei kawei pat ka rel kaba kit ia ki pasenjar.
Tad haduh jong ka step Sngi Ba-ar, ki bor pyniaid ka Bangladesh ki la ioh sei ia 17 tylli ki metiap jong kito kiba la khlad noh syndon hashen ha ka por ba jia katei ka jing iatyngkhuh. Kumjuh ruh la ong ba ki don sa 100 ngut eiei pat kiba la ngat bad mynsaw lang ha katei ka jingjia. Ka Bhairab ka don kumba 60 kilometre lane 38 miles na ka phang Northeast jong ka nongbah Dhaka.
Hynrei la ong ba ka jingdon jong kiba khlad ka lah ban nang kiew bun namar katei ka jingiatyngkhuh ka la jur bad bun kiba ngat ha katei ka jingjia ruh ki dei kiba la mynsaw jur.
Ki paidbah nongshong shnong na katei ka thaiñ tang mar ia ïohsngew ia katei ka khubor, ki la leit her mar-mar sha katei ka jaka ban ioh iarap pyllait im ia kitei ki paidbah kiba shong ha katei ka rel.
Ki bor pyniaid rel ki la iathuh ba kane ka la jia hadien ba kawei na kitei ki rel ka la leit iaid lang na kajuh ka lynti rel kaba dei jong katei kawei pat ka rel.
Katkum ka video ba la saphriang paidbah, la iohi ia ki spah ngut ki briew kiba la leit ban lum ha katei ka jaka ha ryngkat ki ummat kthang kiba tuid katba ki dang pyrshang ban wad ia ki bahaiing- hasem bad ki baieid- bathoiñ jongki kiba shong da katei ka rel ha katei ka jingleit jongki.
Ki bor pyniaid ka Bangladesh ki la bthah ban phah ia 2 jait ki jingtohkit halor kaba iadei bad kane ka jingjia, bad la phah ruh ia ki nongkit kam ba kin ialeh ban ai snam katkum ka jingdonkam ha kane ka por.
U Nazmul Islam, uba long u General Manager jong ka tnat rel Bangladesh, uba long u trai ruh jong katei ka rel, u la iathuh ba hap ban wad ia ka daw jong ka jingleit iaid bakla jong katei ka rel kaba kit mar sha ka lynti iaid jong katei kawei pat ka rel ba kit briew ha katei ka jingjia.
Watla katta, la ong ba ki jingjia aksiden bad jingjia tyngkhuh rel hapoh Bangladesh ki long kiba khah-khah namar ka jingtlot jong ki rukom pyniaid jong ki bor ba dei khmih.
