Sao Paulo, Risaw:
Ha kane ka jingjia, la ong ba kawei ka khynnah skul ka la khlad hashen bad 3 ngut kiwei pat ki la mynsaw jur ha ka Lah Sngi U Blei, hadien ka jingjia synreit kuli hapoh ka skul ha Sao Paulo jong ka nongbah ba heh tam hapoh Brazil.
Kane ka la jia hapoh Sapopemba, ka thaiñ ba don markhap bad ka Sao Paulo bad ia kiba don kti baroh la ioh ban kem noh.
Ki bor pyniaid jong ka Sao Paulo ki la pynpaw ia ka jingsngew khia bad ki la phah ruh ia ka khubor sngewlem sha ka iing-ka sem jong katei ka khynnah skul ba khlad ha katei ka jingjia kaba la jia ha ka step Sngi Nyngkong hapoh ka skul Sapopemba State School.
Katkum ki khubor, la ong ba 3 ngut ki khynnah skul ki la shah siat ha katei ka jingjia, ha kaba napdeng jongki, kawei ka dei ka khynnah kynthei kaba la khlad noh syndon tang hadien kumba katto- katne por. Katba kitei ki 2 ngut pat ki la shu mynsaw bad la pynkit ia ki sha ka jaka sumar naka bynta ki jingsumar kiba bniah. Katba, sa uwei pat u khynnah la ong ba u la shah siat bad mynsaw hynrei u la phet noh na katei ka jaka ha ka por ba katei ka jingjia ka la jia.
Kumjuh ruh ha u Lber, la ong ba uwei u khynnah u la dung iap ia kawei ka nonghikai da ka tari hapoh ka skul ha Sao Paulo hi, ha kaba 3 ngut kiwei pat ki nonghikai ki la mynsaw ha ryngkat bad uwei u khynnah skul uba ïadon lang ha katei ka jingjia.
Katba ha u Iaiong pat, uwei u briew u la leit rung jubor sha ka skul ‘Nursery’ hapoh Blumenau, kaba don sha ka thaiñ South jong ka nongbah Santa Catarina jong ka Brazil, ha kaba u la ioh ban pyniap ia 4 ngut ki khynnah skul bad kumba 5 ngut pat kiba la mynsaw.
