Rafah, Risaw:
Ka tnat ka koit ka khiah jong ka Gaza, ha ka Lah Sngi U Blei ka la pynbna ba ki don palat 5,000 tam ki paidbah nongshong shnong ka Gaza kiba la duh noh ia ka jingim na ka jingther bom ba khlem sangeh jong ka Israel naduh ba khie ka thma tat haduh ka step jong katei ka sngi, ha kaba 40% napdeng jong kitei kiba khlad baroh, ki dei ki khyllung khynnah.
Kumta ruh la ong ba ki la mih ki jingmaham na kiba bun ki tnat bad kiba bun ki ri bad don ruh ki ri kiba la phah ia ki song jingiarap ban pynpoi sha ki paidbah nongshong shnong jong ka Gaza hadien ka jingkyrduh bad jingkordit ba ki mad naduh ba sdang ka thma hapdeng ki lehnoh Hamas bad ka Israel, ha kaba ki lehnoh Hamas ruh ki la rahbor ia palat 200 ngut ki paidbah nongshong shnong jong ka Israel.
Ha katei ka sngi la ong ba ka tnat shipai jong ka Israel ka la pyntip ba la la dep ther kumba 300 tylli eiei ki ‘namding sha katei ka nongbah Gaza hapoh jong ki 24 kynta khlem sangeh, ka tnat ka koit- ka khiah jong ka Gaza ka la pyntip ba ka jingdon jong kiba khlad na ka jingleit ther bom ka Israel ha Gaza, ka la kot ia ka 5,000 ngut bad kumba 40% ki dei ki khyllung- khynnah.
Da ki hajar tylli ruh ki ïingmala ki la julor bad um lut bad kumba shi million tam ki paidbah nongshong shnong ka Gaza ki la shu kylla phetwir noh hadien ba ka Israel ka la khang noh ia ka um, ka bam- ka dih bad wat ka bor ding ilektrik ba ka ju pynpoi bad sam sha Gaza baroh shi katta.
La ong ruh ba katto katne tylli ki trok kit mar bam ki la leit poi sha Gaza lyngba ka Egypt ha ka jingpynpoi mar bam ba 3 sngi kynthih sha Gaza naka bynta ki paidbah nongshong shnong ka Gaza kiba la mad ia ka jingkyrduh bam bad kiba la kylla phetwir ha kane ka thma.
Ka United States, ha ka jingiakren bad ka Israel, ka la kular ban nang bteng ia ka jingphah ia ki mar bam bad ki jingnoh synñiang sha katei ka nongbah Gaza, katba ka thma bad ka Israel kam pat sangeh.
La ong ruh ba katba ka jingiakhun hapdeng ki lehnoh Hamas bad ka Israel ka dang bteng, u Myntri Rangbahduh ka Israel- u Benjamin Netanyahu u la rai ban thombor bad ban pynduh- pyndam syndon ia katei ka kynhun lehnoh Hamas khnang ba kan duh jait noh syndon bad kan nym lah khie khlieh shuh hadien- habud.
