Khliehriat, Risaw 24
Ka Ladrymbai B SC ka la long sa kawei pat ka kynhun kaba la rung sha ka final ha ka lympung ïalehkai 1st Division Football Tournament ba la pynïaid da ka East Jaiñtia Hills District Football Association (EJHDFA)
Kane ka la wan hadien ba ka Ladrymbai B SC ka la pynliem noh ïa ka Tpepswer SSWO da 4-3 lyngba ka jingïashut tie-breaker ha ka jingïakhun semi-final kaba la long ha madan Artificial Turf Diengshynrum, Khliehriat ha ka sngi Ba-ar.
Ka jingïakhun kaba la buh por ban pyndep ka la kut noh khlem don mano mano ba pynkhih jar. Kumta la rah noh sha ka extra time kaba mar 15 minit shilliang bad hangne ruh ka jingïakhun ka la kut khlem da lah ban pynkhih jar.
Kumta ban ïoh ïa ka rai rem rai jop, ki nongpynïaid ki la rah noh sha ka jingïashut tie-breaker bad dei hangne, ka Ladrymbai ka la khur jingjop bad ïoh rung sha ka final.
Te kumta ka Ladrym-bai kan ïaknieh ïa ka nam lahduh pyrshah ïa ka Chiehruphi SYWSC. Baroh ar kine ki kynhun ki la kiew kyrdan sha ka Super Division bad kin ïoh ban ïalehkai naduh ka aïom ka ban wan.
