Shillong, Risaw 24
Ka Mawkynrew Cup Committee ka la wan shakhmat ban pynbna paidbah na ka bynta ban sdang noh ïa ka lympung ïalehkai phutbol ba la tip kum ka 4th Mawkynrew Cup naduh 27 tarik mynta u bnai ha madan Jongksha.
Ïa kane ka lympung yn wan ban plie da u MLA ka thaiñ u Bah Banteidor Lyngdoh ban ïashim bynta da 40 tylli ki kynhun jong ki shynrang bad 16 tylli jong ki kynthei kiba na katei ka thaiñ.
Ka kynhun ka ban ïakhun ha katei ka sngi sdang kan long hapdeng ka Jongksha FC pyrshah ïa ka Khapmaw FC ha ka por 2 baje noh phai sngi nalor ki prokram bapher bapher ki ban pynlong ha shwa ban sdang ïa ka jingïalehkai phutbol.
“Ka jingïai bteng ban pynlong biang ïa ka Markynrem Cup ha ka sien kaba saw ka dei lyngba ka jingïohi jngi ki dkhot jong ka komiti hapoh ka jingïalam u Bah Banteidor Lyngdoh kum u nongmihkhmat jong ka thaiñ bad ka la long kaba seisoh ha kaba ka la lah ban pynmih ïa ki rangïalehkai napoh ka thaiñ kiba la paw ha ka Shillong League ba la pynïaid da ka Shillong Sports Association,” la Convener katei ka Mawkynrew Cup Committee u Bah Ïakmenlang Wankhar haba ïakren bad ki nongthoh khubor ha ka sngi Ba-ar.
“Kiba bun na ki rangïalehkai kiba la ïoh ban ïalehkai ha ka Shillong Premier League kum u Brolington Warlarpih, uba la ïoh ruh ka lad ban lamkhmat kum u kapten ïa ka kynhun ïalehkai ka Jylla ha ki lympung ïalehkai shabar jylla, kumjuh u Fulmoon Mukhim, Divenroy Nongspung bad kiwei kiba la ïoh ban ïalehkai ha ka Shillong League naduh ka SPL, First, Second, Third bad kumjuh ha ka Fourth Division.”
Ha kaba ïadei bad kane ka lympung mynta u snem, ki bor pynïaid ki la pynkhreh ïa ki khusnam na ka bynta ka kynhun ka ban khur ïa ka nam lahduh ka ban ïoh T.2 lak, katba kaba wan ha ka kyrdan ba-ar kan ïoh T. 1 lak. Ka kynhun ka ban khur ïa ka nam lahduh ha ka liang ki kynthei kan ïoh T. 30 hajar bad kaba wan ba-ar kan ïoh T. 20 hajar.
Lah ban pynkynmaw ba ha u snem ba la lah, ka Laitkynhong ka la long ka lahduh ha ka liang ki shynrang bad ka Syniasya women’s team ha ka liang ki kynthei.
