Aizawl, Risaw:
Hashwa ban pynlong ïa ka ilekshon Assembly ha Mizoram, u Myntri Rangbahduh u Narendra Modi un sa lah ba leit sha ka jylla ka ban pynlong ïa ka ilekshon.
U Modi kumba la pynbeit un sa poi ha Mizoram ha ka 30 tarik, Risaw na ka bynta ban ïalap ilekshon na ka bynta ki kyrtong jong ka seng BJP ha ka jylla.
Kumba la ïathuh ka tyllong khubor, u Modi un sa ïalap ilekshon na ka bynta ki kyrtong jong ka seng BJP ha Mamit distrik jong ka Mizoram.
U President jong ka seng BJP ha ka ri u JP Nadda, ki Myntri ka sorkar kmie kiba kynthup ïa u Rajnath Singh bad u Nitin Gadkari ruh kin sa don bynta ha ka jingïalap ilekshon na ka bynta ki kyrtong ha Mizoram.
“U Modi un sa leit jngoh ïa ka Mamit ha ka 30 tarik, Risaw bad ban ïalap ilekshon na ka bynta ki kyrtong jong ka seng,” la ong u President jong ka seng BJP ha Mizoram u Vanlalhmuaka ha ka jingïakren bad ki nongthoh khubor. Ka jingpynkhreh jong ka seng ha kaba ïadei bad kane ka jingwan u Modi ka dang ïaid shakhmat na ka bynta ka jingïalap ilekshon.
Ka seng BJP ka la pynïakhun ïa 23 ngut ki kyrtong na ki 40 tylli ki konstitwensi ha Mizoram. Ïa ka ilekshon Assembly ha Mizoram yn sa pynlong ha ka shi bynta kata ha ka 7 tarik, Naiwieng bad ka jingñiew vote kan sa long ha ka 3 tarik, Nohprah.
Ki la don baroh kumba 8,56,868 ngut ki nongthep vote, kynthup ïa 4,38,925 ngut ki kynthei ki ban sa ïashim bynta ha ka jingthep vote ha ka ilekshon Assembly ha Mizoram.
