Visakhapatnam, Risaw:
Ka ‘Samajika Sadhikara’ bus Yatra jong ka seng kaba bat ïa ka jingsynshar ha Andhra Pradesh ka YSRC kan sa sdang na Itchapuram kaba don ha Srikakulam distrik naduh ka 26 tarik, Risaw, la ong u YV Subba Reddy, uba long u nongkhmih jong ka seng ha ka thaiñ. Kum shi bynta ban sdang ïa ka prokram kaba heh, u Subba Reddy ha ka jingïakren bad ki nongthoh khubor u la ong ba ïa ka Bus Yatra la thmu ban pynlong na ka bynta ban pynkhlaiñ ïa ki rukom pyntreikam jong ka seng na ka bynta ka ilekshon 2024.
Kane ka prokram kan sa ïaid lyngba sha ki lai tylli ki konstitwensi ha man ki lai tylli ki thaiñ man ka sngi, ha kaba kan sa ïaid lyngba ki 175 tylli ki konstitwensi.
Ki nongïalam jong ka seng ki la ong ba ki dkhot jong ka seng kin sa ïakren bad ïaphylliew jingmut bad ki paidbah na ka bynta ban pynlong ïa ki jingpynbna shaphang ki skhim kiba wanrah jingmyntoi bad kiba wanrah ïa ka roi ka par khnang ban ïoh ïa ka jingkyrshan kaba pura.
