Shillong, Risaw 25
U Cristiano Ronaldo u la lah ban pynpaw ïa ka jingtbit na ka bynta ban thep ar kol bad pynlong ïa ka Al Nassr ban pynliem noh ïa ka Al Duhail da 4-3 kol ha ka AFC Champions League.
Kane ka kynhun kaba na Saudi ka la lah ban thep kol ruh lyngba u Sadio Mane bad u Anderson Talisca, na ka bynta ban ïai bteng ïa ka rekod jong ka jingjop kaba lai sien lynter ha ka jingïalehkai jong ka Group-E.
Ha kane ka jingïakhun u Talisca u la ïoh ban pynkhih jar nyngkong eh ha ka minit kaba 25 ha kaba u la ioh ban shut nabar jong ka ‘box’ hadien ba la ïarap pynbuh da u Ronaldo.
U Mane u la pynbud ïa ka kol kaba ar na ka bynta ka Al Nassr hadien 11 minit ba la bteng ïa ka jingïalehkai jong ka kylla miet. U Ronaldo u la lah ban ïaid bteng ban ïalehkai bha ha kane ka jingïakhun bad u la ioh ban thep ïa ka kol kaba nyngkong ka jong u da kaba shut najngai ha ka minit kaba 61 bad ban pynlong ïa ka Al Nassr ban tam da 3-0 kol.
Watla ka Al Duhail ka la shah thep haduh 3 kol, pynban kane ka kynhun hapoh ka jingïalam u rangïalehkai barim ka Barcelona and Liverpool u Philippe Coutinho kam shym la kynran dien ha kaba ka la pyrshang ban ïakhun tyngeh ha kaba ka la ïoh ban pynphai kylla ar kol lyngba u Ismail Mohamad bad u Almoez Ali na ka bynta ban pynlong ïa kane ka kynhun ban kynjoh sha ki 3-2 kol.
Sa tang khyndai minit shwa ban wai, u Ronaldo sa shisien pat u la pynbud ïa ka kol kaba ar ka jong u ha ka minit kaba 85 da kaba shut da ka kjat ka diang na ka bynta ban pynlong ïa ka Al Nassr ban tam da 4-2 kol. Hashwa ban wai artad u Michael Olunga u la ioh ban pynphai shi kol na ka bynta ka Al Duhail ha ka minit kaba 85 hashwa ba kane ka kynhun kan mad ïa ka jingshah rem.
Na ka liang u manager ka Al Duhail u Christo-phe Galtier u la pynpaw ka jingïaroh ïa ka jingïa-lehkai u Ronaldo da kaba ong, “Haba ïakynduh pyrshah ïa u Ronaldo, phin ym lah ban leh eiei. U la ïoh ban thep ïa ki ar tylli ki kol kiba itynnad. Ka long kaba eh ban batai shaphang ka jingtbit ka jong utei u rangïalehkai ba kynsai ba la 38 snem ka rta bad haduh mynta u danglong u rangïalehkai ba kynsai ha ka pyrthei.”
Ha kawei pat ka jingïa -khun, ka Al Hilal kaba la duh ïa u khlur ïalehkai ba kynsai u Neymar uba la mynsaw, ka la lah ban pynjem khnap ïa ka Mumbai City haduh 6-0 kol bad u rangïalehkai sha -khmat barim ka Fulham u Aleksandar Mitrovic u la khur ïa ka hat-trick.
Ha ka jingïakhun jong ka East zone, ka Urawa Red Diamonds na Japan kaba la bat teng ïa ka nam lahduh, ka la mad ïa ka jingshah rem ha la ïing da 2-0 kol ha ka kynhun ïalehkai kaba na South Korea ka Pohang Steelers.
