Shillong, Risaw 25
Ka kynhun ïalehkai kriket ka Jylla ka la ïai bteng ïa ka nam rem ha ka lympung ïalehkai jong ka Syed Mushtaq Ali Trophy 2023 T20 bad ha ka sngi Balang ka la shah rem sa ha ka Haryana da 5 wiket ha Jaipur.
Ha kane ka jingïakhun, ka Meghalaya kaba la shimti ban tied nyngkong ka la kamai 94 rum bad shah pynkhyllem baroh ki nongtied ha ki 19.1 over. Hynrei ka Haryana ka la lah ban kynjoh sha ka thong da kaba kamai 96 run bad shah pynkhyllem 5 wiket ha ki 16.3 over.
Watla ha ki jingïalehkai ba la lah ka Meghalaya ka la ïakynduh jingeh ban kamai run kham bun, hynrei ha kane ka kynti ka la lah ban ïalehkai bha ha kaba u Nahul Verma (guest player) u la lah ban tied 43 run na ki 34 bol, kynthup ïa san tylli ki ‘four’. Katba u Riboklang Hynñiewta, u la lah ban tied 19 run na ki 28 bol bad kane ka long ka jinglah ban tied bun ka jong u ha kane ka lympung.
Haba wan shimti ha ka ban kawang bol ki nongkawang bol ka kynhun jong ka Jylla ki la pyrshang ban ïakhun tyngeh ha kaba ïa ki ar wiket la khur da u Rajesh Bishnoi (2/13 ha ki 4 over). Kiwei pat kiba la ïoh mar shi wiket ki long u Chengkam Sangma (1/17 ha ki 2 over) bad u Akash Kumar Choudhary (1/18 ha ki 3 over).
Te kumta ka Meghalaya ka dangsah sa kawei ka jingïakhun kaba khatduh ha kane ka lympung pyrshah ïa ka Baroda ha ka sngi Thohdieng
Haba phai sha ka jingïakhun jong ki kynthei ha ka sngi Ba-ar, ka Meghalaya ka la mad ia ka jingshah rem ha ka Bengal da 8 wiket ha ka Senior Women’s T20 Trophy.
Haba wan shimti ban tied nyngkong, ka Meghalaya ka la lah ban tied haduh 20 over, hynrei ka la lah ban kamai 43 run bad shah pynkhyllem 7 wiket. Ka Rubi Chettri (12 not out) bad ka Luiza Tamang (12) ki la long ki nongtied kiba la tied bun ha kane ka kynhun. Katba ka Rebeldalis Syiemlieh (1/8 ha ki 1.5 over) bad ka Ajima Sangma (1/8 ha ki 2 over) ki la lah ban khur mar shi wiket na ka bynta ka Meghalaya.
Te kumta ka Meghalaya kan ïakhun pyrshah sa ïa ka Chandigarh ha ka sngi Palei.
