Beijing, Risaw:
Katkum ki khubor la ong ba ka China ha kane ka por, ka la ai jingkyrshan ia ka Israel bad ong ba ka Israel ka don hok shisha ban iada ia la u pud u sam bad ban iada ia la ki jong ki paidbah watla ka hap ban iakhun pyrshah ia ki lehnoh bad ka hap ban pynthut ia ki paidbah nongshong shnong ka Palestine. Pynban kane ka long ka hok jong ka ban ialeh pyrshah ia kitei ki lehnoh kiba pynthut ia ka shongsuk- shongsaiñ hapoh Israel bad kiba la thombor bad pyniap dusmon ruh ia ki mynsiem ba lui-lui jong ka Israel.
Kane ka jingkren na u nongialam ka China- u Xi Jinping ka long hadien ba ka China ka la pyrkhat sani bha halor ka jingbym shngaiñ jong ka Israel na kitei ki lehnoh jong ka Palestine, bad ka Israel ka hap ban leh eiei wat lada donkam ban pynduh jait noh syndon ruh ia kum kitei ki kynhun lehnoh kiba ap jingma ia ka Israel bad ia kiwei ruh ki ri hadien-habud.
Une u nongialam ka China ha ka taiew ba la dep, u la kyntu ia ka Israel bad lehnoh Hamas ba kin sangeh noh ia ka thma bad ha kajuh ka por ruh u la kular ban iatrei lang bad ka Egypt kumjuh bad kiwei ki ri Arab ha ka ban wanrah ia ka shongsuk- shongsaiñ ha ki sngi ki ban wan, namar la ong ba kane ka thma ka la pynjot bad pynduh ei ia shibun bah ki mynsiem ba lui-lui kiba la kylla phetwir bad mad ia ka jingkyrduh tang namar jong ka thma ki lehnoh Hamas bad ka Israel ha kane ka por.
Watla katta, la ong ba ka China na kaba sdang, ka la kyntait ban pynrem ia ka jingleh ki lehnoh Hamas, ha kaba 1,400 tam ki paidbah nongshong shnong ka China ki la khlad bad iap ei ha ka jingther ‘namding bad jingther bom dusmon jong kitei ki lehnoh ha ka 7 tarik jong une u Risaw.
Hynrei, ha kane ka por la ong ba ka China ka la pyrkhat bha bad ka donkam ban ai jingkyrshan ia ka Israel hapdeng ka jingiakhun jong ka pyrshah ia kitei ki lehnoh ka Palestine. Ha kajuh ka por ruh la ong ba ka China kam shym don jingthmu eiei sha lyndet haba iadei bad ka Israel bad kumta ruh ka China ka ngeit skhem ba watla kane ka thma ka la pynthud ia ka Palestine ha kane ka por, hynrei ka jingiadei hapdeng ka Palestine bad ka Israel kan long kumba la dep ban iakut bad kan iaid beit shakhmat ynda la kut kane ka thma hapdeng ki lehnoh jong ka Palestine bad ka Israel.
