Khliehriat, Risaw 25
Ka 12-Dolloi Football Team bad ka Ar Dolloi Football Team ki la khur jingjop ha kaba sdang ïa ka lympung ïalehkai 1st Open To All Veteran Football Tournament ba la pynïaid da ka East Jaiñtia Hills District Football Association (EJHDFA) ha ka sngi Balang ha madan Artificial Turf kaba ha Diengshynrum, Khliehriat.
Ha ka jingïakhun kaba nyngkong, ka 12 Dolloi Football Team ka la pynliem da 1-0 kol ïa ka Old Star Football Team bad ïa kane ka shi kol la thep da u Golden Mukhim ha ka minit kaba 27.
Ha ka jingïakhun kaba bud, ka Ar Dolloi Football Team ka la pynliem noh da 3-1 kol ïa ka EJHTOTA.
Ïa ki kol jong ka Ar Dolloi Football Team la thep da u Swellmon Shylla ha ka minit kaba 36 bad 41 bad u Erick Dkhar ha ka minit kaba 52. Katba ka shi kol jong ka EJHTOTA la thep da u Deolangki Dkhar ha ka minit kaba 8.
Ïa kane ka lympung ïalehkai la plie da u General Secretary ka EJHDFA u Bah Coming Onejoy Tlang ha ka jingdonlang u Waheh Shnong Diengshynrum u Bah Wilbert Nongtdu, ki dkhot nongkitkam ka synjuk bad kiwei kiwei ki ‘riew rangbah ka thaiñ.
