Imphal, Risaw:
U heh jong ka kynhun Meitei Leepun u Pramot Singh u la buh ka jingkyrpad na ka Manipur High Court ban lait na ka jingshahkem haduh u bnai Nohprah ha kaba ïadei bad ka jingjia kaba long pyrshah ïa u ha ka jaka treikam jong ki pulit ha Churachandpur ha u Jylliew jong une u snem ba mynta.
Ïa ka mukotduma la mudui hapoh ka jingtreikam jong ki kyndon namar ka jingwanrah jong u ïa ki jingïashun hapdeng ki kynhun riewlum bad ban kren pyrshah ïa ka jinglong trai ri ha ka jingïakren jong u ha ka rynsan jong ka The Wire’s Karan Thapar ha basdang jong u bnai Jylliew.
Ha ka 9 tarik, Risaw, u Chief Judicial Magistrate jong ka Churachandpur u la wanrah da ka shithi maham ban kem ïa u Singh, ha kaba la ong ba ki pulit jong ka Imphal West kim shym la ïatreilang ha kaba ïadei bad ka jingkyrpad jong ki pulit ka Churachandpur na ka bynta ban leit khynra ïa ka ïingsah jong u.
U Singh hadien kane, u la leit mih hakhmat ka Manipur High Court, ha kaba u la kyrpad ba la dei ban weng bad pyndam noh ïa ka jingujor ejahar kaba long pyrshah ïa u.
U Justice Ahanthem Bimol Singh, ha ka 20 tarik, Risaw, u la hukum ïa u Singh ba u la dei ban shah pynsangeh ha ka ban kem ïa u haduh ka tarik ban shah tian bishar ha ka 6 tarik, Nohprah.
Ka High Court ruh ka la phah ïa ka jingthoh sha ka sorkar Manipur bad ki pulit jong ka thaiñ ha Churachandpur bad ha Imphal West ha kaba ïadei bad ka jingkyrpad jong u Singh ba la dei ban pyndam noh ïa ka jingshah mudui ejahar jong u.
“Kum shi bynta ban khmih bniah ha kaba ïadei bad ki jinglong jingman ha ka jylla bad ka jingap jingma ïa ka jingim jong une uba la mudui, lada jia ba u leit mih hakhmat u Chief Judicial Magistrate, ha Churachandpur, la buh ka hukum ba haduh ban da dei ban bishar kumba la khmih bniah ïa ka jingkyrpad jong u, une uba la buh jingkyrpad um dei ban shahkem bad ba u la dei ba leit mih hakhmat u Chief Judicial Magistrate, ka Churachandpur khlem ïaid lait na ka ïingbishar,” la ong ka High Court ha ka jingai hukum jong ka.
