Imphal, Risaw:
Ka jingshna ïa ki ïing ba bun kynrad na ka bynta ki briew ki bym don jaka sah shuh hadien ba la jia ki jingïakynad bajur ha Yaithibi Khunou kaba don ha Thoubal distrik ki la dep lut artad bad kaba sah mynta ka long sa tang ban buh ïa ka um, la ïathuh ki heh ba dei khmih. Ynda la dep ban pynbiang ïa ki rukom pyntreikam ha ka ban tan um ha kine ki ïing, kine ki ïing ki la long ban pynsah ïa ki lanot ki bym don ïing don sem shuh jong ki 400 tylli ki longïing ha kaba yn sa plie ïa ki ha ka taïew ban wan.
Ha ka lah sngi U Blei, u Chief Secretary jong ka Manipur u Dr Vineet Joshi u la leit ban jngoh bad khmih bniah ïa ki rukom pyntreikam ha kaba ïadei bad ka jingshna ïa kine ki ïing ha ryngkat ka jingdonlang ki heh jong ka Public Health & Engineer Department (PHED).
Ki la don palat 60,000 ngut ki briew kiba la shah ktah na ki jingïakynad ba la jia naduh ka 3 tarik, Jymmang ha ka jylla ha kaba kane ka la pynlong ïa ki ba kin sah ha kumba 351 tylli ki jaka sah ba shipor ha baroh ar kata ha ki distrik kiba don ha ki jaka them bad ha ki jaka lum.
Ki la don kumba katto katne ngut ki briew kiba la shah pynkynriah sha ki ïing lynter ba dang dep shna thymmai ha Sajiwa bad Sawombung jong ka Imphal East distrik, ha Sekmai kaba don ha Imphal West bad ha Kwakta kaba don ha Bishnupur distrik.
