Shillong, Risaw 25
Ka Kharang SC ka la long ka kynhun kaba nyngkong eh ban jam sha ka semi final jong ka lympung ïalehkai 4th Division Football League 2023 ba la pynïaid da ka Shillong Sports Association.
Kane ka jinglah ban pynthikna ka la wan urlong hadien ba pynliem ïa ka Pommura SC da 1-0 kol ha ka jingïakhun quarter final kaba nyngkong kaba la long ha ka sngi Balang ha SSA Stadium, Polo.
Ka jingïakhun ha kane ka sngi kaba la long kaba itynnad bad kaba ïakhaid bha ha kaba baroh ar ki kynhun ki la pyrshang ban ïakhun tyngeh naduh kaba sdang, hynrei kim shym la lah ban thep kol haduh kaba kut jong ka kylla step.
Hadien ar minit ba la bteng ïa ka jingïakhun jong ka kylla miet ba ka Kharang ka la ïoh ban pynkhih jar nyngkong eh lyngba u Laban Taro (47). Kane ka shi kol ka la nangpynïoh mynsiem ïa kane ka kynhun na ka bynta ban ïai bteng ban ïalehkai bha, kumjuh ka Pommura kaba la pyrshang ban pynphai, hynrei kam shym la lah ban pynurlong haduh kaba kut ka jingïalehkai bad ka la mad ïa ka jingshah rem.
Ka jingïaknun quarter final kaba ar kan long ha ka sngi Palei hapdeng ka Mawpdang SC pyrshah ïa ka Iatyllilang SC ha ka por 2 baje janmiet.
