Tel Aviv, Risaw:
U Myntri Rangbahduh ka Israel, u Benjamin Netanyahu ha ryngkat ka jingiadon lang bad u Myntri ka tnat iada- u Yoav Gallant bad kumjuh ruh u Lt General Herzi Halevi, ha ka Sngi Ba-ar, ki la ong ba ka Israel ka donkam ia ka jingiatylli bad jingiatrei lang ban pynliem bad pynduh jait ia ki lehnoh Hamas.
Ha ka jingkren jongki hapoh ‘X’, la iohi ia ki jingkren jong kitei ki 3 ngut ki heh nongialam ka Israel halor ka thma hapdeng ka Israel bad kitei ki lehnoh Hamas jong ka ri Palestine.
Kumta, ha katei ka video ba la ai jingkren, u Netanyahu u la ong ba ha katei ka sngi u ïeng ryngkat bad ki heh ka tnat iada, ban pynpaw ia ka mynsiem iatrei lang bad ka jingiatylli lang kawei jong ki nong Israel naka bynta ban iakhun pyrshah ia kitei ki lehnoh ka ri Palestine kiba la wan thombor ia ka Israel bad kiba la pyniap dusmon ia ki mynsiem ba lui-lui jong ka Israel. Namar kata ruh la ong ba ka Israel kan nym ailad shuh ia katei ka kynhun lehnoh ba kan khie khlieh biang ne ioh bor biang hadien- habud bad dei na kane ka daw ba ka Israel kam kwah shuh ruh ban ïasuk hapdeng ka thma bad kitei ki lehnoh ka Palestine namar ka kwah ban pynduh jait bad ban rat dyngkhong syndon ia baroh ki kam thombor jong ki lehnoh ha kane ka sien.
Kumta ruh u Netanyahu u la ong ba ha kane ka kynti, baroh ki heh ki la rai ban ïeng tylli lang kawei bad ka IDF, ki shipai bad ki Commander jong ka ri, ha ka ban iakhun tyngeh bad ban pynduh jait noh syndon ia katei ka seng lehnoh kaba long ka jingma kaba khraw ia ka Israel bad ia kiwei ruh ki ri hadien-habud.
