Guwahati, Risaw:
Ki pulit jong ka Goalpara da ka jingjop kaba khraw ki la ïohlad ban kem ïa 7 ngut ki runar kiba la donkti ha ki kam tuh kam lute ha Solmari Kali Mandir jong ka Agia kaba don ha Goalpara distrik ha ka jingleit khynra ha ka sngi Saitjaiñ.
Ïa kine ki runar kiba la shahkem la tip kyrteng kum u Mominur Islam bad u Mujibur Rahman jong ka South Salmara Mankachar distrik bad u Abdul Matin, Habil Khandkar, Abu Taleb, Mujibur Rahman bad u Ibrahim Ali jong ka Goalpara distrik.
Kane ka jaka mane blei kaba la shah lute ka don hapoh ka jaka kaba jngai tang kumba 1 km na ka jaka sangeh bos jong ka Solmari Tiniali bad kumba 7 km na Goalpara bad ha kane ka jaka mane blei ki ju bun ki riewngeit kiba ju rung hapoh jong ka da baroh shi snem.
Ka kynhun jong kine ki runar ka la jied ïa ka por shiteng synñia na ka bynta ban leh ïa kine ki kam beaiñ ha kaba ki la tuh ïa ki tiar bad ki jingbuh jingsat kiba remdor kynthup ïa ki dur mot blei thaw kiba la kot da bun lak tyngka.
Ha kaba ïadei bad kane, la ïathuh ba ïa kine ki kam runar jong ki la ïoh ban khmih bniah lyngba ka CCTV ba la buh ha ka Temple.
“Da ka jingtrei shitom ka kynhun hapoh ka jingïalam jong u SP, ka Goalpara u VV Rakesh Reddy bad da ka jingïatreilang ki pulit ka Agia la ïoh ba kem ïa kine ki 7 ngut na Goalpara bad na South Salmara Mankachar distrik, ha kaba la ïoh ban kurup ruh ïa kumba 90 percent ki jingbuh jingsat bad ki durmot jong kane ka jaka mane blei,” la ïathuh u Khargeswar Rabha uba long u DSP jong ka jaka treikam jong ki pulit.
