Beijing, Risaw:
Ka China bad ka Bhutan ha ka sngi Ba-ar, ki la soi ia ka jingiakut ‘Cooperation Agreement’ ban iatrei lang bad ban kyntiew ia ka jinglong-jingman ha baroh arliang ri bad kumjuh ruh halor ka jingdonkam ia ka Joint Technical Team (JTT) ban pynbit-pynbiang ia ki jingdonkam jong baroh 2 tylli ki ri.
U Myntri ka tnat kam bar ri jong ka Bhutan, u Dr. Tandi Dorji, uba dang leit jurip sha China ha kane ka por bad kumjuh ruh u Symbud Myntri ka tnat kam bar ri jong ka China- u Sun Weidong, ki la pynlong ia ka jingiakren ba 25 Kylla ha ka Sngi Nyngkong bad Sngi Ba-ar ban iakren halor ki kam ki jam ki ban pynkhlaiñ ia ka jingiadei bad jingiatrei lang hapdeng kine ki arliang ri.
Kumta ruh la ong ba kitei ki Myntri ka tnat kam bar ri jong ka China ki la iakren bad u Myntri kam bar ri jong ka Bhutan- u Wang Yi ha ka Sngi Nyngkong ha kaba ki la kyntu ia ka Bhutan ba kan wanrah ia ka jing-iadei kaba iaid beit-iaid ryntih bad ka China, bad ban pynkut noh ia ki jingïakynad khappud namar ka jingiatrei lang ka kham bha ban ia ka jingïashrut bad kan kyntiew ruh ia ka jinglong jingman jong baroh arliang ri.
La ong ba kine ki arliang ri ki la iakynduh lang ban wanrah ia ka jingiakren kaba 25 Kylla ha kane ka por hadien jong ka jingialang ba 24 Kylla haba iadei bad ka ‘Boundary Talks’ ba la long ha u snem 2016.
Ha katei ka jingiakren, la ong ba kitei ki nong-ialam ki la ioh ban iasoi ia ka ‘Cooperation Agreement’ hapdeng ka Bhutan bad China halor ka jingshim jingkit khlieh bad ki rukom treikam jogn ka ‘Joint Technical Team (JTT)’ haba iadei bad ka ‘Delimitation & Demarcation” jong ka Bhutan bad China.
Kumta, la ong ba kine ki arliang ri ki la mynjur ban iatrei lang bad ban wanrah ia u soh ka jingjop lyngba ka jingiatrei lang jongki ha kane ka por bad la ngeit skhem ruh ba ka jingiatrei lang jongki nangne shakhmat kan wanrah ia ka lawei ba phyrnai ha ki pateng ki ban wan.
