Watla kiba bun ki rynsan ‘Social Media’ ki la mih na ka Ri America, hynrei ki nongïasaid aiñ ha ki jylla bapher-bapher jong kane ka Ri ki la ai da ka jingmudui mukotduma pyrshah ïa ki rynsan jong ka kompani Meta bad ki kynhun ba ïatreilang bad ka, da kaba kynnoh ba kane ka kompani ka la buh ïa ki katto-katne ki bynta ha Instagram bad Facebook kiba pynkylla ïa ki khynnah bad samla lud ban long kiba kyrni ha ka jingpyndonkam ïa kine ki rynsan kaba la ktah pat ïa ka bor pyrkhat bad ka bor met jong ki. Kane ka dei ka nuksa kaba pyni shai kdar ba ki briew ki la sngewthuh ba ki rynsan ‘Social Media’ ki don ka jingktah ïa ka bor pyrkhat pyrdaiñ jong ki briew haduh ba ka la pynlong ïa ki ba kin kylla kyrni syndon.
Ngim lah ban len ba ka jingpyndonkam palat ïa ki rynsan ‘Social Media’ ka ktah shikatdei ïa ka met ka phad bad ka bor pyrkhat. Ngi ïohi ba ki khynnah bad samla, kumjuh ruh ïa kiba la heh la san, ki ju pynlut por da ki phew kynta ha ka shi sngi ha ki ‘Mobile Phone’ ki jong ki ban ïalehkai lane ban pynbyrngia ïalade katkum ba pynmih ha ki ‘Social Media’ haduh ba la ishyrkhei sa ban peit. Bun ki duh thiah duh dem lada ki rem ha ki jingïalehkai bapher-bapher kum ka PUBG. Bun kim kynmaw shuh ban bam ha ka por bad ha ka rukom kaba dei namar ki la kyrni shaba palat ha ki rynsan ‘Social Media’. Bun kiba la hap ban leit ïasyllok bad ki nongsumar ban ïoh dih dawai khnang ba kin lait na ka jinglong kyrni. Bun ki jingïania ïamai ki mih ha ki longïing longsem tang namar ka jingpynlut por palat ha ki jingïalehkai ha ki ‘Mobile Phone’. Bun kiba la ngop ha ki jingshah shukor pisa ha ki briew kiba kam ïalade ba ki dei na shabar ri. Bun kiba kylla dukha mynsiem hadien ba ki sngewthuh ba kaei kaba ki ïohi ha ki ‘Social Media’ kim long satia kiba dei bad ki long tang ki jingpynthame bad jingpynbyrngia.
Ka Ri America ka dei kaba la shah kheiñ kum ka ri kaba shai, hynrei watla katta ruh, la donkam ban ujor syndon sha ïingkashari pyrshah ïa ki rynsan ‘Social Media’ kiba peit beit thik tang ïa ka jingïoh kamai da kaba pynlong ïa ki khynnah ban kyrni. Lada kat ka Ri America ka la sngewthuh ïa kane ka jingma, kiwei ki Ri ruh ki dei ban bud nuksa lang ban pynbor ïa ki rynsan ‘Social Media’ ba kin long kiba adkar bad ba kim dei ban pynmih than ïa kiei-kiei ki jingpynbyrngia kiba ktah nadong-shadong ïa ka jingim jong ki briew. Kam dei satia ka rukom ba kita ki ‘Social Media’ kin synshar ïa ka jingim briew. Lada ka ïai bteng ha kane ka dur, ka jingim briew kan kylla laiphew jait laiphew skit haduh ba kan sa jynjar ïa ki longïing longsem. Ngin hap ban ïada ïa ki khynnah na ka jingkylla kyrni ha ki rynsan ‘Social Media’ khnang ba kan ym ktah ïa ka pyrkhat ka pyrdaiñ ka jong ki bad ba kin pynleit jingmut ha ki kam ki jam kiba lah ban tei ïa ki ha ki liang bapher-bapher.
Ngi dei ban kynmaw ba kine ki rynsan ki long kum ka waitlam arliang syrti – ki lah ban ïarap na ka bynta ka jingbha bad ki lah ruh ban thaw ïa ki jingkulmar bad ki jingpynlamwir kiba bun phew rukom. Ka shong kumno ngi pyndonkam bad ïa ka liang aïu jong ka syrti ngi jied. Naduh ba sdang ïaid ïew bha ki rynsan ‘Social Media’, ki jingsniew ruh ki la nang shyrkhei. Ki buit ba pyndonkam da ki riewsniew bad ki runar ki la nang kyllaiñ bad ki buh jingeh ruh wat ïa ki pulit ba kin thwet. Kat nang mih ki sngi, katta ki nang mih ki buit kiba laiphew jait laiphew skit ba lah ban pyndonkam ban thok ban shukor ïa ki briew, ban tuh pisa khlem da donkam ban ïa rah da ki suloi bad ki tiar pynmynsaw ne ban leit sha ki jaka kynshew pisa, ban pynngop bad ïalam bakla ïa kiba lui-lui, ban thad ïa ka longrynïeng jongno-jongno, ban wanrah ïa ka jingbym ïa sngewthuh jingmut hapdeng ki nongshong shnong bad ki kynhun bapher bapher, ban wanrah ïa ka jingïaumsnam bad kumta ter-ter. Shibun ki jingkulmar ki lah ban mih tang na kawei ka jingthoh ne ka dur thaw nang. Ngi la ïohi ïa kiba kum kine ki jingjia na ka por sha ka por.
Ka jingbun palat ki kam be-aiñ bad shukor lyngba ki rynsan ‘Social Media’ bad ki kor ki bor ka la nang pynbunkam ïa ki nongshong shnong bad kumjuh ruh ïa ki pulit. Ki nongshnong shnong ki la hap ban leit ujor sha ki pulit namar ka jingshah shukor pisa lane ka jingpynsaphriang ïa ki dur ki dar bad kumta ter-ter. Ki pulit ki bunkam ban tohkit ïa kine ki jingujor bad ban kem ïa kiba donkti. Kam dei kaba suk ban ïohkem ïa ki nongshet shukor lyngba ki rynsan ‘Social Media’ namar ki don bun ki bym don ha kane ka jylla lane wat ha ka Ri, hynrei kiba treikam na shabar. Namarkata, donkam ban ïa husiar hi nalade ban ym ngop kulmar ha ki jingshah pynbiej. Da ïa peit bha ïa ki jingthoh bad ki khubor kiba phi ïoh khnang ba phin lait na ka jingshah riam hano-re-hano.
