Kabul, Risaw:
Ki bor pyniaid jong ka Afghanistan ki la iathuh ba u jumai uba 4.3 Magnitude u la pyn khynñiuh ia ka ri Afghanistan ha ka Sngi Palei ha ka por kumba 1 baje mynstep ha ka jingkhlaiñ kaba 37.00 Latitude bad 72.88 Longitude bad kumba 150 kilometre ka jingjngai.
La ong ba une u long u jumai uba saw ba katei ka ri ka la ioh mad hadien jong u jumai uba jur uba la khynñiuh ha ka thaiñ Herat ha ki khyndiat por ba la leit, ha kaba 4,000 tam ki la khlad na utei u jumai ha katei ka por.
Ha ki khyndiat por ba la leit, la ong ba u jumai ba 5.4 u la pyn khynñiuh ia ka Afghanistan ha ka 15 tarik jong une hi u Risaw.
Kumjuh ruh ha ka 11 tarik u Risaw, ka Afghanistan ka la sakhi ia u jumai uba haduh 6.1 Magnitude bad uba la pynkhynñiuh ia katto katne ki bynta jong katei ka ri.
shuh shuh ruh la ong ba ha ka taiew ba la lah, u jumai uba khlaiñ u la pyn khñiuh ia ka thaiñ Herat jong ka Afghanistan ha kaba palat 4,000 ngut ki briew ki la duh noh la ka jingim ha utei u jumai bad bun tylli ki iing briew bad ki jingtei kiba pher ki la julor bad um lut ha utei u jumai uba khlaiñ bor.
Ia utei u jumai la lah ruh ban ïohsngew na ki bynta ba marjan jong ka nongbah Heart namar ka jingkhlaiñ jong utei u jumai uba la jan kot ia 6.3 Magnitude bad uba la pyn khñuh jur khamtam ia katei ka thaiñ Herat baroh kawei.
Ka tnat Disaster Management jong ka sorkar Taliban hapoh Afghanistan, ka la pynbna ba ki don palat 1,983 tylli ki iing briew kiba la julor ha utei u jumai, hapoh jong ki 20 tylli ki shnong ka nongbah Herat ha ka Sngi Saitjaiñ jong ka taiew ba la lah.
Hynrei, la ong ba ka Taliban kam shym la pynpaw shai ne iathuh shai ia ka jingdon kiba shah ktah bad kiba khlad na utei u jumai ha kylleng jong ka thaiñ Herat baroh kawei.
Kumjuh ruh ha ka step Sngi Palei, ka tnat National Centre for Seismology (NCS) ha ka Sngi Balang, ka la pyntip ba u jumai uba ka jingkhlaiñ kumba 4.5 Magnitude u la pyn khñiuh ia ka nongbah Xinjiang jong ka China ha katei ka sngi bad u la pynkhynñiuh ruh ia kumba 10 kilometre hapoh katei ka nongbah.
Hynrei, ym shym la don kiba ngat ne mynsaw na utei u jumai.
