U Prime Minister u ïa kynduh ïa ki Rangbah Riewlum (APHLC)
Ha kane ka 10 tarik ha ka por 11 baje mynstep u Prime Minister Jawahalal Nehru u la ïa kynduh ïa ki Rangbah jong ka APLHLC ha kawei na ki kamra kyrpang jong ka airport ha Guwahati. U Prime Minister u la hiar khnang ha Guwahati ha ka lynti jong u na Dibrugarh sha delhi ban iakynduh bad ka delegation jong ka APHLC bad tang ia ki hi. La don bun ngut ki Rangbah sorkar, ki Minister bad ki paidbah kiba la wan khnang sha ka airport ban iohi ïa u Prime Minister. Ha ka jingiakren bad ki Rangbah APHLC, u Governor ka Assam u la ïa don lang. Ka jingïakren ka la neh haduh jan shi kynta ei ei.
Ki Rangbah APHLC ki la ai ha u Prime Minister ka memorandum ha kaba ki la ban bad lada ka sorkar India kam leh ei ei kloi ban pynioh ha ki Riewlum ïa ka State kaba kyrpang na ka bynta jong ki, imat, kiei kiei kin poi sha kaba mynsaw ha kine ki bynta jong ka Ri India.U Prime Minister ula batai pynshai ha ki Rangbah Riewlum ba ha ka jingtyrwa jong uba la khot kyrteng Scottish Pattern u thew tang ïa iwei i bynta bad ita i long i jingïadei ki Riewlum bad ka Assam ha kaba shna ïa ki aiñ bad u ong ba hapoh kane, ka Legislative Assembly kam lah ban shna kano kano ka aiñ ka ban ktah ïa ki Riewlum lymda ki Riewlum hi ki mynjur ïa kata ka aiñ.Nalor kane ka Scottish Pattern U Prime Minister u pynpaw ba u kwah ba ka synshar-khadar, ka jinghikai, ka jingpynroi-pynman ka ktien – ka thylliej, bad kiei kiei baroh kiba ïadei ki Riewlum kin long ha ki kti ki Riewlum hi. Ym dei shuh, namarkata, ban khot ïa ka jingtyrwa jong ka Sctotish pattern.
Ki Rangbah riewlum kila kylli ïa u Prime Minister balei haba u la pynpaw ba u kloi ban ai lut ïa ki bor pynïaid ha ki riewlum ba u dang tyngkai pat ban ai syndon ïa ka state ba kyrpang ïa ki. U Prime Minister u la jubab ba ka daw ka long ba um kwah ban pynshlur ïa ki jingïapharia ïa ki jaka phutta ha ka jingïadei bad ka synshar khadar ha India namar ba kane ka pynlutksan shibun bad kam ïarap ïa ka jinglong kawei jong ka Ri India. Hynrei u pynpaw ruh ba u dang kwah ban dang ia kren kham janai ïa kiei kiei khnang ba kan wan ka bha ka miat. U Prime Minister u la kyntu ïa ki Minister ula kyntu ïaki rangbah APHLC ban ia kren ïa ki details bad u Governor ka Assam bad nadien kata ban sa ïa kren pat ha Delhi.
Ki Rangbah kiba la kynduh ïa u Prime Minister ki long kine : Prof. G G. Swell M.P., Stanley Nichols Roy MLA, Mr.B.B.Lyngdoh MLA, Mr. Hoover Hynniewta MLA. Mr. Justman Swer, Mr. E. Bareh CEM (Khasi Hills), Mr.W Sangma MLA, Mr. Mody Marak CEM (Garo Hills), Mr. Lalmawia(Mizo Hills), Mr Langthasa (NC Hills), Mr. Raidang Ingty and Mr. Tuso (Mikir Hills).
[U NONGSAIÑ HIMA (12 tarik Jylliew, 1963)]
