Nongpoh, Risaw 26
Ka lympung ïalehkai phutbol Ri Bhoi Super League ba la pynïaid da ka Ri Bhoi District Sports Association (RBDSA) ka la sdang ha ka sngi Palei da ka jingplie paidbah da u Project Director jong ka District Rural Development Agency, Ri Bhoi District, u Raja Brahma ha madan ialehkai jong ka Umsning Patarim.
La sakhi ruh ha kane ka sngi da ka jingïadon ryngkat jong u Block Development Officer ka Umsning C&RD Block, u Bah E. Lyngdoh lem bad u District Sports Officer ka Ri Bhoi, u Bah Bobby Lyngdoh Nongbet.
Kiwei pat ki ‘riew rangbah kiba la ïadon ryngkat ha kane ka sngi, ki kynthup ïa lai ngut ki MDC barim ka thaiñ Ri Bhoi, kita u Bah R.R Makdoh, u Bah Otril Pamshong, u Bah William Mynsong, ki nongïalam ka RBDSA ba kynthup ïa u Bah R.B Shadap, u Bah G.S Shadap, Bah Pull Nongrum bad kiwei kiwei.
Haba ai jingkren ha kane ka sngi, u Raja Brahma kum u kongsan, u la ai ka jingïaroh sha nongïalam jong ka RBDSA kiba la lah ban pynlong ïa kane ka lympung ïalehkai phutbol kaba long ka rynsan ïa ki samla ïalehkai phutbol ka thaiñ ba kin ïoh ban sei ïa la ka sap ka phong bad kin nang kiew shaphrang ha ka kam ïalehkai jong ki.
U la kyntu ruh ïa ki nongïalehkai ba ki dei ban minot bad ïalehkai bha naba ka kam ïalehkai phutbol mynta kam dei shuh tang ban kilanmet lane ban ïoh ïa ka jingkoit jingkhiah, hynrei ka dei ka lad ban kamai ruh lada ki lah ban lehbha bad shah jied ban ïakhun ha ki lympung kiba kham heh ha ka Jylla bad ka Ri hi baroh kawei.
Shuh shuh, u la ong ruh ba ka lyngba ka jingkilanmet jong ki, ki lah ruh ban ïakhun ïa ka kam sorkar kum ka kam pulit kaba donkam ïa ka met ka phad kaba biang bad kaba koit ba khiah.
Ha kane ka lympung ïalehkai phutbol jong ka Ri Bhoi Super League, ki la don kumba hynñiew tylli ki kynhun ki ban ïakhun ïa ka nam lahduh kiba kynthup ïa ka Kynjoin Umran SC, Nongthymmai Kyrdem SC, Lumniwar SC, Umran Dairy SC, Mawtari SC, Umeit SC bad ka Jyntru SC.
Haba phai sha ka jingïalehkai sdang mynta ka sngi kaba la ïakhun da ka kynhun da ka kynhun jong ka Kynjoin Umran SC pyrshah ïa ka Nongthymmai Kyrdem SC, la ïohi ba ka jingïakhun ka long kaba itynnad bad kaba ïakhaid bha naba baroh ar tylli ki kynhun ki la ïakhun tyngeh bad sei ïa la ka sap ka phong.
Hadien ka jingïakhun kaba la neh kumba katto katne por jong ka kylla step, ka kynhun jong ka Kynjoin Umran SC ka la ïoh ban pynkhih nyngkong ïa ka jar da kaba tam 1-0 ha ka kylla step. Haba wan ban mih madan biang ha ka kylla miet, ka kynhun jong ka Nongthymmai Kyrdem SC ka la ïoh pat ban pynphai kylla bad ka jingïakhun ka kut noh ha ka jingïakhaid da 1-1 kol.
Ha ka jingïalehkai kaba ar pat, la ïakhun da ka Jyntru SC ka la pynliem noh da 2-0 kol pyrshah ïa ka Umeit SC ha ka jingïakhun kaba itynnad bad kaba la pynshongshit ïa ki paidbah.
