Lewiston, Risaw:
ki bor pyniaid jong ka Lewiston ha ka Sngi Palei, ki la iathuh ba 22 ngut ki la khlad noh ha ka jingjia synreit kuli hapoh ka thaiñ Maine jong ka United States, ha kaba ki pulit ki la jer kyrteng ia uwei u suba don kti ha katei ka jingjia, uba la ithuh kyrteng kum u Robert Card bad la bthah ia ki paidbah nongshong shnong jong katei ka thaiñ ba kin ym mih shabar ka iingsah hynrei ba ki shah shitom bad ban shong hapoh ki iing- ki sem jongki katba ka jinglong- jingman ha katei ka jaka kam pat shngaiñ bha.
Kumta, la ong ba ki bor pyniaid ka Lewiston tang mar ia ioh khubor halor katei ka jingjia ha katei ka sngi, ki la maham ia ki paidbah ba kin shong khop bad setkut ialade hapoh ki iing- ki sem, namar ka jingma kaba ap ia ki lada ki leit iakynduh bad ki runar kiba don kti ha katei ka kam thombor khamtam haba kitei ki runar ki don ia ka tiar siat bad kaba long ka jingma kaba khraw ia ka jingim ki riew paidbah.
Hadien katei ka jingjia, ki pulit ki la pynsaphriang ia ka dur jong uwei u briew uba la suba don kti ha katei ka jingjia, uba la ithuh kum u Robert Card bad uba la shondur ialade hapoh katei ka jaka ha ryngkat ka suloi ha ka kti jong u bad ki pulit ki la maham ruh ia ki paidbah ba ki dei ban kiar lada ki thaw ia kynduh ia utei u briew ha kano- kano ka jaka.
Kumjuh ruh la ong ba ka ïingbishar ka la pharep ia u Robert Card kum u suba don kti ha katei ka jingjia halor ka jingsynreit kuli ha Schemengees bar bad ha Sparetime Recreation ha katei ka jan miet Sngi Balang.
La ong ruh ba u Card, uba la don 40 snem tam ka rta, u dei u heh pulit ba la shong thait na ka kam bad uba la shah kem ruh ha ki por ba la leit namar ka jingdon kti jong u halor katto katne ki kam thombor ha iing- ha sem.
Kumjuh ruh ha ki khyndiat por ba la leit jong une pat u snem, la ioh jingtip ba u Card u la don jingshitom ha ka bor pyrkhat naduh ka jingbym lah shuh jong u ban ïohsngew bha bad kumjuh ruh la ong ba utei u briew u la byrngem ban leit thombor ia ka jaka pyntbit jong ki shipai hapoh Saco jong ka nongbah Maine. Hadien kata, la sumar ia u hapoh ka jaka sumar khlieh kumba 2 taiew.
Hynrei ha kane ka por pat, la ong ba la iohi ia utei u briew ba u la leit rung sha ka kali White Subaru jong u tang mar ia dep jia katei ka jingjia synreit kuli, ha kaba ki pulit ki la suba bad pharep beit- beit ia utei u briew ba u long uba don kti ha katei ka jingsynreit kuli kaba la jia ha katei ka jaka, ha kaba 22 ngut ki la khlad noh bad katto katne ngut pat kiba la shah ktah bad mynsaw na katei ka jingsynreit kuli.
