U Nongsaiñ Hima, 1987
Ha man la ki khyllipmat jong ki arphewsaw kynta, ki briew ki treikam, ki shongthait, ki rkhie ki ïam, ki pyrkhat ki bam, bad kane ka long ia baroh kawei ka pyrthei bad kumjuh ruh hangne ha rilum, ne ha kane ka sor Shillong. Dang step ki briew ki mih ban leit trei leit bylla, ynda dum ki wan pat sha la ki ïing ki ïing, bad haba peit kumne, i kumba baroh ka biang ka dap bad baroh ki bun ïa la ka jingim ha ki arphew saw kynta.
Hynrei ba la shimet, ki don ki jingkhuslai ki jingangnud kaba ki briew ki pyrkhat bad ïaleh ban lait na kine. Ka jingkylli kaba mih namar don ma na kine ki briew kiba iaid kiba ïeng man la ka sngi kiba pynpyrkhat lem ïa kiwei pat, ne don na kiba ai por tang shi minit ha ka arphew saw kynta ban pyrkhat shaphang ka ri bad ka jaidbynriew.
Ka jubab ka long lehse kaba sngewsih ban ong ba ym don, lait noh hangne hangtai, kiba ïa kren ïa khana shaphang ki jingeh ba ha ka jaidbynriew ka jingkynduh bunsien shukut noh tang ha ki bad ki dorbar. Lada ka don kum kata ka jingpyrkhat, ka la dei ban paw pyrthei, ka la dei ban saw jam, ka la dei ban don ka jingmut ban pyllait ïa ki jingeh kiba long dieng pyngkiang ïa ka jaidbynriew.
Lada rem ka bam ka dih, ka shu kut tang ha ka thnum ka ktuk, ka kynjik kynjak, khlem da don kano kano ka jingpyrshang ne jingïalam ban ïaleh pyrshah ïa ka jingkiewdor. Lehse ki don ki jingkiewdor ki bym shong hok, kiba ki nongkhaiï ki mahajon ki shu leh jubor ban bor ïa u duk u suk, hynrei kum ka kita ym don ba wad ym don ba kylli, bad bunsien la shu myllen noh, ne hun ïa kum kine kiei kiei.
Lada jakhlia ki surok bah jong ka sor, bunsien ka shu kut tang ha ka jingset ïa la ki khmut, bad ñiar ban don kiba leit sha Municipal. Lada don ka jingduna um, bunsien ka shukut da ka jingdih noh shiteng klat ka um ha ka jaka shi klat, ne kaba sum noh shisien shi taiew ha ka jaka man ka sngi.
Lada ka bor jong ka radio station ha Shillong ka long tang shi kilo wat kaba lah ban iohsngew tang ha jylli kaba shiphew mile, ki nong Shillong ki shu hun noh tangba ki la ioh sngap ïalade khlem da don jingpyrkhat ïa kiwei kiwei ki para ri kiba sha kyndong kynshrot.
Kaei sha kaba tyllep ïa u paidbah ba un shu sngap tlip tlip ban shu long mutlop bad im ka mynsiem mraw ? Ka jubab ka long ba iwei pat iwei i dei ban pyrkhat, la kumno kumno shi khyllipmat hapoh ka arphew saw kynta.Ka long kaba lehnohei ban ïa kren ïa kiei kiei kiba heh lada tang ïa kita kiei kiei kiba rit ngim pat lah ban pei phang. Bunsien ngi ïaleh ban kynjoh ïa kitei ki khlur ba phyrnai ha sahit bneng, hynrei kan bha lada ngi tam shuwa ïa ki mawria napoh jat jongngi.
