Ha kine ki khyndiat sngi, ka la don ka khubor halor ka jingïoh pyllait jong ki pulit ka sorbah Mumbai ïa 9 ngut ki kynthei, ba kynthup ïa kawei na ka jylla Meghalaya, na kawei ka ‘Spa’ kaba don ha Mumbai. Napdeng kitei 9 ngut kiba la ïoh pyllait im ha katei ka jingkhynra, 7 ngut ki dei na ka Thaiñ Shatei Lam Mihngi. Ki pulit hadien ka jingïoh jingtip, ki la khynra ïa ka jaka khem met ne ka ‘Spa’ kaba ha ka thaiñ Andheri bad pynpulom ïa ka jingtreikam jong ki kam khaïi met kaba heh bha. Ha katei ka jingkhynra, ki pulit ki la ïoh ban pyllait im ïa 9 ngut ki kynthei na katei ka jaka ba kynthup ïa 4 ngut na Manipur, 2 na Mizoram, 1 na Meghalaya, 1 na Kolkata bad 1 na Lucknow. Na ka liang ki pulit ki la kem ruh ïa u Manager jong katei ka jaka khem met ba la ithuh kum u Chandrakant. Hynrei ïa u trai jong katei ka jaka khem met ba la tip kyrteng kum u Atul Dhivar u dang don hapdeng ka jingphet rieh. Ki pulit ki la suba ba ki don shibun ngut ki heh ki haiñ bad ‘riew pawkhmat na Mumbai kiba ïadon bynta lang ha kane ka kam jaboh.
Kane ka jingjia ka pyni sa shisien pat ïa ka jingbym long shngaiñ ban shaniah kulmar ha ki nongtyrwa ai kam ai jam shabar jong ka jylla. Ha ki snem kiba mynshwa ruh, ki la don ki kynthei na kane ka jylla kiba la ngat ha ka jingshah die ha ki ktem die met ha ki sorbah Delhi, Mumbai, Kolkata. Kiba bhabok, ki la ïoh phet lane ki la shah pyllait im ha ki pulit. Hynrei ki don ruh lehse kiba ym tip shuh shano ki don mynta. Ka long shisha ka jingma namar ka jingkhaïi briew lane ‘human trafficking’ na ka bynta ban die met, pyntrei ha ki shlem bapher-bapher hapdeng ki jingma kiba bun, bad kumta ter-ter ki jur bha ha kylleng ka pyrthei. Ki la don bun bah ki khep ba ki khynnah bad ki kynthei ki la shah pyllait im na ki jaka trei kiba buh jingma ïa ka koit ka khiah jong ki.
Ki samla samhoi kiba wad kam wad jam kim dei ban kmen lada don kiba tyrwa ban ai kam ai jam ïa ki shabar jylla. Ki dei ban da wad bniah shwa da kaba kylli na ki thanat pulit lane ki bahaïing hasem kiba la kham sngewthuh lane na ki paralok bad kumta ter-ter. Kaei kaba ki pyni shabar barabor kam ju long satia ka jingshisha. Nalor ka long da kumwei, shapoh ka long da kumwei. Kane ka dei kaba ngi hap ban ïa husiar. Teng-teng ha ka jingsngewkmen ba shah tyrwa kam shabar, ngi kum kloi ka leit mareh ban thied tiket rel ne liengsuiñ ban poi noh sha kata ka jaka. Phewse ynda la poi shata, ki ngat pynban ha ka jingshah ban beiñ ba bun rukom tangba kin ym ïoh pat ïa ka lad ka lynti ban wanphai noh sha la ïing la sem. Namarkata, ka jinghusiar bad jingpeitngor ka long kaba donkam shikatdei ban lait na ka jingbabe kylla.
Ha kane ka pyrthei mynta, kam dei kaba suk ban shukor ïano-ïano khamtam ïa kiba wad kam wad jam. Ha kajuh ka por, kam dei kaba jwat ban tip ïa ki jingshisha namar ka jingdon bun bah ki lad ki lynti ban wad ïa ki jingtip ba thikna. Ki samla samhoi ki dei ban nang ban pyndonkam ïa kita ki lad ki lynti lyngba ki kor ki bor Internet bad ban pynlong ïa ka jingpule kaba bniah ha shwa ban shim rai. Wat ïa kyrkieh ban ïa leit tur shano-shano tang ba la don ba tyrwa da ka jingsiew kaba heh. Lada dei ka kam kaba shisha kumba la batai, kam pher lada leit shano-shano ruh. Kan bha shibun lada ïoh ka lad ban leit trei shabar jong ka jylla namar ka jingsiew ka kham heh bad ki kam ki kham bun haba ïanujor bad ka jylla lajong.
Sa shisien pat, ngi kyntu ïa ki kmie ki kpa ba kin ïarap lem ïa ki samla samhoi ba kin long kiba husiar haba wan ki jingtyrwa kam na shabar jylla ne na sha shiliang duriaw. Ki kmie ki kpa kim dei ban pynbor ïa ki khun ba kin leit trei shata shabar katba ym lah ban pynthikna la kita ki nongtyrwa kam ki dei kiba shisha lane kiba shu wan ban shukor ïa ki. Lada nang ban husiar, yn lait na kiba bun ki jingeh hadien habud. Lada trei ka jingbym sngewthuh bad jingbym ïohi jngai, lah ban ngat pat ha ki apot kiba sniew kiba yn ym lah shuh ban pynlaitluid ïa ki.
