Tel Aviv, Risaw:
Katkum ki khubor la ong ba u heh jong ka Hamas Intelligence Directorate, u Shadi Barud, u la khlad noh hapdeng ka jingther bom jong ka Israel sha Gaza Strip ha ka Sngi Palei.
Ka IDF ka la kynnoh ba u Barud u don jingiadei bad u iatrei lang bad u heh ka kynhun lehnoh Hamas- u Yahya Sinwar ha ka jingpynkhreh ban leit hiar thma ia ka Israel ha ka 7 tarik u Risaw.
Nalor kane, la ong ba dei u Barud ruh uba ialam ia ki kynhun lehnoh ha ki thaiñ Khan Younis bad uba la bat ia shibun tylli ki kam hapoh jong katei ka tnat Intelligence Directorate.
Kumta, ha ka Sngi Palei, ka IDF ka la pynbna ba u Shadi Barud, uba long u Deputy Head jong ka Hamas Intelligence Directorate, u la khlad noh ha ka jingther bom jong ki liengsuiñ ka Israel sha Gaza Strip ha katei ka sngi.
Ha kajuh ka por ruh ka Israel ka la byrngem ba kan ym ailad ne sangeh ia ka thma hynrei ba kan pynhiar kput haduh kaba kut bad ban pynduh-pyndam syndon ia katei ka kynhun lehnoh kaba long ka jingma kaba khraw ia ki pateng ki ban wan.
Namar ka Israel ka la buh shun ruh ia katei ka kynhun lehnoh kaba la pyniap dusmon ia ki paidbah jong ka ha ka 7 tarik jong une u Risaw bad kumta ruh ka Israel kam lah shuh ban map ia ka jingleh palat jong kitei ki lehnoh bad ka la rai ban kput haduh ban da ioh ban pynduh jait syndon ia katei ka kynhun lehnoh.
