Gaza, Risaw:
Katkum ki khubor na ka Arab Al Jazeera TV, la ong ba ki bahaiing- hasem naduh ka kurim, ka khun bad u khun jong uwei u nongthoh khubor ruh ki la khlad lut baroh na ka jingther ‘namding ka Israel sha Gaza ha ka miet jong ka Sngi Balang.
Tat haduh ba la pynmih ia kane ka khubor ha ka step jong ka Sngi Palei, la ong ba kam shym don kano-kano ruh ka jing pynphai ktien na ka liang ka tnat shipai jong ka Israel haba iadei bad kane.
Hynrei la ong ba ki lad pathai khubor ka Palestine ki la pyntikna ia ka jingïap jong kitei ki bahaiing jong utei u nongthoh khubor, ha kaba la iohi ruh ia utei u nongthoh khubor uba la ithuh kum u Wael Al Dahdouh, uba la iam kthang hajan ka metiap jongki hapoh ka hospital hadien ba ki la khlad noh namar ka jingmynsaw kaba jur na ka jingbthei ki ‘namding ba la siat da ki shipai ka Israel sha Gaza.
