Shillong, Risaw 27
U MLA ka Mawkynrew Constituency u Bah Banteidor Lyngdoh u la pynpaw ïa ka jingkhmih lynti ban kyntiew kyrdan noh ïa ka Mawkynrew Cup sha ka Mawkynrew Cup Premier League khnang ba kan long ka jingmyntoi ïa ki samla jong ka thaiñ kiba don ia ki sap ïalehkai phutbol.
Haba ïakren bad ki lad pathai khubor hadien ba la plie ïa ka 4th Mawkynrew Cup ha ka sngi Thohdieng ha madan Jongksha, u Bah Banteidor u la ong ba lyngba kane ka lympung ha ka sien kaba saw ki la mih shibun ki rangïalehkai kiba la ïoh ban ïalehkai na ki klob jong ka Shillong Premier League, kumjuh na ki klob jong ka First, Second, Third bad ka Fourth Division.
“Nga sngewkmen ba lyngba kane ka lympung ki la mih shibun ki rangialehkai kiba la ioh ban mihkhmat ha ka Shillong League ba la pyniaid da ka Shillong Sports Association (SSA) bad nga khmih lynti ba kin nangiai mih shuh shuh ki rangialehkai ki ban ioh iashim bynta na ki klob ka nongbah Shillong bad wat shabar jylla ruh kumjuh.”
“Ki don ruh na ki rangialehkai kiba la ioh ban mihkhmat ruh ia ka Jylla ha ki lympung ialehkai shabar Jylla. Ngam da donkam ban da jer kyrteng ia ki namar nga tharai phi iatip bha kiei kita ki rangialehkai kiba na kane ka thaiñ,” u la bynrap.
“Dei lyngba ka jingmih ki rangialehkai ba ngi sa shim ia ka rai ban pynlong ia ka Mawkynrew Cup na uwei sha uwei u snem namar ki ioh ia ka lad ban mihkhmat na ki klob ha ka Shillong League.”
Utei u nongmihkhmat bad uba la ïadon bynta lang ruh bad ka Mawkynrew Cup Committee u la pynpaw ka jingkhmih lynti ruh ban iai bteng ban pynlong ia ki lympung ialehkai jong ki kynthei namar kim ju duna ia ki 16 tylli ki kynhun kiba wan iashim bynta.
Halor ka jingmih ki rangialehkai kiba kynsai, u Bah Banteidor u la ong ba ka por ka la dei ban kum ka komiti kan pynlong noh da kawei ka lympung ïalehkai kata ka Mawkynrew Cup Premier League, ka ban iasoh bad ban ithuh noh da ka Meghalaya Football Association khnang ba kan long ka jingplie lad ia ki rangialehkai ka thain ba kin ioh ban ïashim bynta ha ki lympung ïalehkai ban pynlong da ka MFA.
