Shillong, Risaw 27
U President ka Indian Weightlifting Federation (IWF) u Sachdev Yadav u la kyntu ïa ka Meghalaya State Olympic Association (MSOA) ba kan shim khia ban pynbeit ïa ki kynrum kynram jong ka Meghalaya Weightlifting Association.
Kat kum ka kyrwoh ba la pyllait da u Working President ka MSOA u Bah John F. Kharshiing u la pynpaw ba ha ka jing-ïakynduh ïa utei u nong-ïalam ka IWF ha ka sngi Thohdieng ha Goa, u Yadav u la pyntip ba ka la dep phah shithi sha ka MWA bad kumjuh sha u General Secretary ka MSOA na ka bynta ban shim khia ban ïarap pynbeit ïa ki kam ki jam jong ka Meghalaya Weightlif-ting Association.
Ka IWF ka la mynjur ban weng noh ïa ka rai sospon halor ka nongrim ba ki la wan siew pyndep ïa ka bai ‘affiliation’ bad ba ki dei ban pynlong noh ïa ka ilekshon bad ban jied ïa ki nongkitkam kiba thymmai bad ruh ban pynlong ïa ka lympung ïalehkai (state championship).
