New York, Risaw:
Hadien ka jingiakhih jong ki paidbah na kylleng ki ri ban pyrshah ia ka jingshah thombor ki paidbah nongshong shnong ka Gaza ha ka jingther bom jong ka Israel sha Gaza naduh ba sdang jong ka thma ha ka 7 tarik u Risaw, la ong ba ki kynhun khynnah pule kiba dei ki Jiw (Jewish) ki la leit ban shong riehtngen hapoh ka thiar kynshew kot (Library) kaba don hapoh Cooper Union jong ka nongbah New York, katba kiwei pat ki kynhun kiba bun ki dang ia pyrta ia ki kyntien ‘Free Palestine’ na shabar jong katei ka jaka.
La ong ba kitei ki kynhun kiba pyrshah ia ka jingleh jong ka Israel, ki la leit tied bad kyndar ia ka jingkhang jong katei ka thiar kynshew kot hadien ba la tip shai ba kitei ki khynnah nong Jiw ki la ioh ban phet rieh bad shong hapoh jong katei ka jaka.
Watla katta, la ong ba ki pulit jong ka New York, hadien katto katne kynta ki la pyntip ba ki la ioh ban pynmih noh ia kitei ki khynnah na katei ka jaka ha ka rukom kaba shngaiñ bad kam shym la don kano-kano ka jingma kaba ap ia ki hadien ynda ki la mih na katei ka jaka.
Ha kaba sdang jong katei ka thma, la ong ba ka Israel ka la pynbna ba palat 1,400 ngut ki paidbah ki la khlad na ka jingther ‘namding dusmon jong ki lehnoh Hamas sha Israel ha ka 7 tarik u Risaw, ha kaba 5,400 tam pat ki la mynsaw bad shah ktah na katei ka jingjia. Kumjuh ruh kitei ki lehnoh ki la rahbor ia kumba 200 tam ki briew na Israel bad kiba bun na kiba shah rahbor ki dei tang ki ‘riew paidbah.
Hadien jong kane, ka Israel ka la pynbna da ka thma pyrshah ia kitei ki lehnoh Hamas jong ka ri Palestine bad ka (Israel) la ther ‘namding bad ther bom khlem sangeh sha kylleng ki bynta jong ka Gaza kiba don ia ki ktem treikam jong kitei ki lehnoh Hamas. Bad ka Israel haduh mynta- mynne, ka la smai ba kan pynhiar kput bad kan pynduh jait noh syndon ia kitei ki lehnoh kiba long ka jingma kaba khraw ia ka Israel bad ia kiwei ruh ki ri hadien habud.
