Jowai, Risaw 27
Ka Dulong ka la ïoh jingjop ha ka lympung ïalehkai First Division Football Tournament (Chatister Kharkongor Memorial Trophy 2023) ba la pynïaid da ka West Jaiñtia District Sports Association (WJDSA).
Kane ka la wan urlong hadien ba ka pynliem ïa ka Sohmynting da 1-0 kol ha ka sngi Thohdieng ha Kiang Nangbah Stadium kaba ha Ladthadlaboh, Jowai. Ïa kane ka kol la thep da u Kevin Rymbai ha ka minit kaba 10.
Ha ki jingïakhun First Division kiba la long ha ka sngi Palei hapdeng ka Nangbah Ïawmusiang bad ka Demthring ki la kut ha ka jingïakhaid mar 1-1 kol.
Watla kine ki kynhun kim shym la lah ban thep kol ha ka kylla step, hynrei ka Nangbah ka la ïoh ban pynkhih jar nyngkong eh lyngba u Joplangki Chal-lam ha ka minit kaba 55. Hashwa ban wai ka Demthring ka la lah ban pynphai kylla lyngba u Maidong Mukhim ha ka minit kaba 81.
Ha ka jingïalehkai jong ka Super Division, ka Nangbah Mulang ka la pynliem noh ïa ka Ladthadlaboh da 3-1 kol. Ïa ki ar kol la thep da u Wirldrick Susngi ha ka minit kaba 27 & 66 bad ïa ka shi kol la pynbud da u Chanhok Siangshai ha ka minit kaba 90+3. Katba ka shi kol jong ka Ladthad-laboh la thep da u Banteilang Shylla ha ka minit kaba 60.
Ka jingïakhun ha ka sngi Saitjaiñ ha ka First Division kan long hapdeng ka Luti Tuber SW pyrshah ïa ka Khliehïongriang ha ka por 12 baje mynsngi. Katba ha Super Division kan long hapdeng ka Khimusniang pyrshah ïa ka Mukhla Raij ha ka por 2 baje janmiet.
