Shillong, Risaw 27
Ka Jongksha FC ka la ïoh ïa ka jingjop ha kaba sdang ïa ka lympung ïalehkai 4th Mawkynrew Cup hadien ba pynliem noh ïa ka Khapmaw FC da 1-0 kol ha ka sngi Thohdieng ha madan Jongksha.
Ïa kane ka lympung la plie da u MLA ka Mawkynrew Constituency u Bah Banteidor Lyngdoh kum u kongsan ha kaba la ïadon lang u BDO ka Mawkynrew u Bah G. Dhar kum u Symbud kongsan, u Sordar ka Jongksha u Bah Olet Kharsahnoh, ka Chairperson ka Mawkynrew Cup Committee ka Kong Amanda Annette Pakynteiñ, ki ophisar ka Meghalaya AIDS Control Society, kumjuh na ka tnat ïalehkai bad kiwei.
Ha kane ka kynti kaba mynta ki la don haduh 40 tylli ki kynhun jong ki shynrang bad 16 tylli ki kynhun jong ki kynthei kiba la wan ïashim bynta ka ban sa bteng biang ïa kane ka lympung ha ki sngi ki ban wan.
Haba phai sha ka jingïakhun jong kane ka sngi sdang, baroh ar tylli ki kynhun ki la pyrshang ban ïakhun tyngeh naduh kaba sdang ha kaba ki la ïoh ïa ki kabu kiba biang, hynrei kim shym la lah ban thep kol.
Ha kane ka sngi la pynshongshit lyngba ka jingïadon lang ki paidbah nongpeitkai kiba la wan ban wai jingkyrshan ïa la ki jong ki kynhun. Watla ka Jongksha ka la ïoh ïa bun tylli ki kabu ksiar, hynrei kam shym la lah ban thep kol na ka daw ka jingïashan tyngeh u rangapkol ka Mawkhap, uba la lah ban pyllait ban pyllait na ka jingshah thep.
Kane ka jingïai pyrshang ka la wan urlong ha ka minit kaba 63 lyngba u Pyrkhatborlang Kharsahnoh. Kane ka shi kol ka la nangpynïoh mynsien ïa kane ka kynhun bad haduh kaba kut ka jingïalehkai kine ki kynhun kim shym la lah shuh ban thep kol bad ka Jongksha ka la khut syndon ïa ka jingjop.
Hashwa ban sdang kane ka lympung ïalehkai, la pynlong ïa ki prokram bapher bapher kiba kynthup ïa ki jingïaid march pass jong ki skul bapher bapher jong katei ka thaiñ, ki jingrwai bad jingshad bapher bapher.
Ka lahduh ha kane ka lympung kan ïohpdiang ïa ka khusnam kaba T.2 lak, katba kaba wan ha ka kyrdan ba-ar kan ïoh T. 1 lak. Ka kynhun ka ban khur ïa ka nam lahduh ha ka liang ki kynthei kan ïoh T. 30,000 bad kaba wan ba-ar kan ïoh T. 20,000.
