Washington, Risaw:
Ka United States ha ka Sngi Palei, ka la phah lypa ia kumba 900 ngut ki shipai ban leit pahara sha Middle East hadien ba ka jinglong- jingman kam shngaiñ shuh namar ka jingma kaba ap na ki shipai ka Iran ha kine ki sngi.
La ong katba ka thma hapdeng ka Israel bad ki lehnoh Hamas ka dang iai bteng, ki shipai jong ka US bad jong kiwei pat ki ri ba iatrei lang bad ki shipai US, ki la shah thombor kumba 12 sien ha ki shipai ka Iraq bad kumba 4 sien eiei ha ki shipai Syria ha kane ka taiew ba la lah bad kane ka la pynlong ia ka US ba kan pynkhreh ia la ki jong ki shipai khnang ba kano- kano ka jingma kan ym lah ban ktah ia ki paidbah ka US lada shah thombor ha kano- kano ruh ka por.
Namar la ong ba ki don haduh 21 ngut ki shipai ka US kiba la mynsaw na ka jingshah thombor dusmon ha ki shipai ka Iraq bad Syria ha kane ka taiew ba la leit.
Kumta ka United States ka la phah ia ki jhad thma bad ki liengsuiñ thma jongka sha kitei ki bynta kiba ap jingma bad ki bynta ba markhap bad ka Syria bad Iran naduh ba la mih ka jingïakynad bad ki ri Arab namar jong ka thma ki lehnoh Hamas bad ka Israel.
La ioh jingtip ruh ba ka US ka la ialeh katba lah ban pynkhreh bad ban phah leit pahara bad ban ai jingiada sha Middle East namar ka jingma kaba ap na ka Iran ha kane ka por.
Ka US ka la pynjur ruh ia ka jing pyn-ap pahara, ki jingphah syntiat bad ban phah iaid pahara ia ki bor pahara khamtam ha ki thaiñ bad ki bynta ki bym da shngaiñ bad kiba ap jingma.
La ong ruh ba kane ka jingphah shipai ka US ha kane ka por, ka long ruh katba ka US ka dang thmu ban sei noh da ki ‘Terminal High Altitude Area Defence (THAAD) bad ki ‘Patriot Missile Batteries’.
Namarkata, la ong ba u Myntri ka tnat kam bar ri jong ka Iran, u la byrngem ba lada ka thma Israel kan dang neh bad iai bteng, ka Iran ruh kan nym pyllait ia ka US namar baroh ka dei ka jingleh jong ka US ba ka leit kynshoit bad pynshlur bad ai mynsiem ruh ia ka Israel ban pynheh ia ka thma.
