Mawkyrwat, Risaw 27
Ka Mawbidong Khyllem Kharai Association for Welfare and Social Development ha ka sngi Palei ka la pynhap pyrda noh ïa ka lympung ïalehkai phutbol kaba ar sngi ha madan Mawbidong, SWKHD.
Ha kane ka lympung la wan ïashim bynta haduh 16 tylli ki kynhun jong ka dong ka thaiñ Riwar bad ha ka jingïakhun phainal, ka Team One ka la lah ban pynliem noh da 5-4 kol ïa ka Lajong HK.
Ha kane ka sngi la sakhi lang ïa kane ka jingïalehkai ba itynnad naduh ki hep barit, ki samla kynthei bad shynrang lem ki longkmie longkpa jong ka dong ka thaiñ.
Ïa kane ka lympung la wan ban pynhap pyrda da u Bah Jeslanroy Nongsiej, uwei na ki ’riew rangbah jong ka dong ka thaiñ Mawkyrwat ha ryngkat jingdon lang u Bah Tanlum K. Kharai, Myntri Mawbidong, Bah K. Nonglait, Bah G. Lartang bad kiwei kiwei ki ’riew rangbah.
