Shillong, Risaw 27
Ka khun ba ak lang bad ka Wanri Pyngrope ha ka phlim ‘Ka Daw’ ka Hanidawanshwa ka la sdang ban khie samla namar ha ka por ba ka dang shah jied ka dang don tang kumba 7 snem. Kane ka khynnah mynta ka la kynjoh sha ka 13 snem hadien ba ïa ka phlim ‘Ka Daw’ la sdang ban pyni biang ha Bijou Cinema.
La ïohi ba ki paidbah ki la wan ban ai jingkyrshan ïa kane phlim (Ka Daw) ha Bijou Cinema, Shillong kaba la sdang pyni biang mynta ka sngi ka 27 tarik Risaw 2023. Kane ha kawei ka liang ka la wanrah ruh ka jingkmen ïa u trai ka Bijou Cinema hadien ka jingbym ïaid ïew shuh ka phlim u Tiger Shroff ka ‘Ganapath’ kaba la pyni tang shi taïew.
Ïa kane ka phlim (Ganapath) la sdang pyni ha ka 21 tarik mynta u bnai Risaw ha ka ri India, bad ha Shillong la pyni ha Bijou Cinema bad Anjalee Cinema. Na ka liang ki paidbah kim shym la wan ban ai jingkyrshan ïa kane ka phlim namar kam da itynnad bad kam da don ïa ka khana ban pynsngewtynnad ïa ki paidbah.
Kumta u trai ka Bijou Cinema u la phone noh sha u Kiki Garod uba dei u Director ban pyni noh ïa ka phlim ‘Ka Daw’ naduh mynta ka sngi ka 27 tarik mynta u bnai Risaw ha Bijou Cinema. Ïa kane ka phlim yn pyni saw sien ha ka shisngi; kata naduh 11 baje mynstep, 2 baje nohphai sngi, 5 baje janmiet bad 7:30 mynmiet.
Ha kane ka sngi sdang pyni, ka Wanri Pyngrope bad ka Hanidawanshwa kaba ak kum ka khun ha kane ka phlim ka la sdang ban khie samla haba ki wan ïuh kjat lang ha kane ka sngi ha Bijou Cinema. Haba ïakren bad ka Wanri bad u Kiki ki la pynpaw ka jingsngewkmen ba ki paidbah ki la wan ban ai jingkyrshan ïa ka phlim wat lada ki la dep pyni arsien.
