Iraq, Risaw:
U Myntri ka tnat Bar Ri jong ka Iran, u Hossein Amirabdollahian ha ka Sngi Palei, haba ai jingkren sha ka United Nations, u la maham pyrshah ia ka United States ba lada jia ba ka thma hapdeng ka Hamas bad ka Israel kan nang jur bad neh slem, ka Iran kan nym pyllait ia ka United States bad kan ther kumba leh ka Hamas ia ka Israel.
U Hossein u la kren pyrshah ruh ia ka United States bad buh jingkylli hato mano ba khmih bad pyniaid ia ka jinglong- jingman hapoh Palestine mynta, bad dei na kane ka daw ruh ba ka Iran ka la maham ia ka US ba kane ka thma kam dei ban neh slem shuh bad ka dei ban kut bad sangeh noh katba ka por ka dang biang.
Hynrei, na ka liang jong ka Israel pat, la ong ba ka Israel ka la smai ba kan pynduh- pyndam noh syndon ia katei ka kynhun lehnoh Hamas, kaba long ka nongsynshar jong ka Gaza baroh shi katta. Hynrei ka jingleh jong ka Hamas ha ka 7 tarik jong une u Risaw, ka long ka bym lah pdiang bad ka Israel kam lah shuh ban map ne klet noh bad kumta kan pynhiar kput haduh ban da ioh ban pyniap lut ia baroh kitei ki lehnoh Hamas.
Katba, na ka liang ki lehnoh Hamas pat, ki la iathuh ha ka Iran ba ka Hamas ka la pynkhreh bad ka long ba la kloi ban pyllait lut noh ia baroh ki paidbah nong Israel kiba la shah rahbor ha ki lehnoh Hamas naduh ba sdang jong ka thma, hynrei tang lada ka Israel kan sangeh noh ia katei ka thma.
