Shillong, Risaw 29
Ka India ka la bteng ban khur ïa ki nam jop ha ka lympung World Cup 2023, ha kaba ka la jop baroh hynriew tylli ki jingïakhun haduh mynta. Kane ka la wan hadien ba ka lah pynliem noh ïa ka England da 100 run ha ka jingïalehkai kaba la long ha ka Sngi U Blei ha Lucknow.
Kumba ka long mynta ka India ka la lah ban pynpaw ïalade kum kawei na ki Ri kiba khlaiñ bor ha kane ka World Cup, hadien ba ka la lah ban khur jingjop ha baroh 6 tylli ki jingïakhun khamtam ruh ban jop ïa kiwei pat ki Ri kiba khlaiñ kum ka Australia, Pakistan, New Zealand bad England.
Lyngba kane ka jingjop, ka India ka la kamai 12 dor-thong (point) na ki 6 tylli ki jingïalehkai bad ban kiew sha ka kyrdan kaba nyng-kong ha ka miej ïakheiñ dor-thong. Kane kan nang pynjan ruh ïalade ban ïoh rung sha ka semi-final jong kane ka lympung.
Haba phai sha ka jingïalehkai, ka India kaba la hap ban tied nyngkong kam shym la lah ban sdang ha ka rukom kaba biang bad tang ha ka jingkamai 40 run ka la duh 3 wiket. Kumta lyngba ka jinglah ban tied bha jong u Rohit Sharma uba la kamai 87 run bad u Suryakumar Yadav uba la tied 49 run, la lah ban pynlong ïa ka India ba kan kamai 229 run na ki 50 over bad hap 9 wiket.
Haba beh ïa kane ka thong kaba rit, kumjuh ka England ruh kam shym la lah ban ïoh ka jingsdang kaba paka bad ha ka por ba ka la kamai 39 run ka la duh haduh 4 wiket bad nangne shakhmat ka la bteng ban hap wiket.
Kane ka jinglah ka India ban ïada ïa ka thong kaba rit, ka la wan urlong ruh lyngba ka jinglah ban kawang bol bha jong u Mohammed Shami uba la khur haduh 4 wiket bad ai tang 22 run na ki 7 over bad u Jasprit Bumrah uba la khur 3 wiket bad ai 32 run na ki 6.5 over bad u Kuldeep Yadav uba la khur 2 wiket bad ai 24 na ki 8 tylli ki over.
