Shillong, Risaw 29
Kan long shisha ka khubor ka ban pynkmen ïa ki nongshong shnong ka Mawsynram namar hadien 28 snem na ka jingïakynad ki kam shnong kam thaw, kumta ha ka 28 tarik mynta u bnai (Risaw) ha ka jingialang ha shnong Mawsynram Dong Pata la ïasoi ïa ka Memorandum of Understanding (MoU) ba kine ar tylli ki shnong ki la poi sha ka jingïasngewthuh jingmut.
Katkum ka jingpynbna u Rangbah Shnong ka Mawsynram Bah Lastborn Shangpliang, u la ïathuh ba naduh u snem 1995 haba mih ka jingïapher jingmut hapdeng ka shnong Mawsynram bad ka Dongshilliang ki la don ki bynta ba la ai mukotduma bad don ruh kiba la sah patok.
U la pynpaw ka jingsngewkmen hadien 28 snem kane ka jingïalong kawei ha ka kyrteng ki nong Mawsynram ka la wanphai biang da kaba pyndonkam biang ïa ki tyllong um, ban sum lang ha kajuh ka wah, ban tep briew lang ha kajuh ka jaka bad kiwei de ki jingdonkam ki paidbah.
U la ong ban wanrah ïa ka jingïalong kawei la thaw ïa ka dorbar pyllun khnang ban kynthup ïa ki 3 tylli ki dong kum ka Mawsynram Dongrum, Mawsynram Dongneng, Mawsynram Wahlyngdiar bad ka shnong Mawsynram Dongshilliang kaba don la u Rangbah Shnong.
Ha kane ka sngi ïasoi MoU la wan lang baroh ar ngut ki Rangbah Shnong Mawsynram ba la mihkhmat da u Bah Lastborn Shangpliang bad Mawsynram Dongshilliang da u Bah Pynsuk Myrthong ha ka jingsakhi u Acting Syiem Bah B. Marbaniang, Bah Alvin Sawkmie ha ka jingïadon ryngkat ki ar tylli ki Dorbar Shnong bad ki nongshong shnong.
