Jerusalem, Risaw
Ka United Nations (UN) ha ka Sngi Saitjaiñ, ka la maham ba ka jingïap jong ki briew ha Gaza na ka thma Israel bad Hamas kan sa nang kiew shuh shuh namar ka Israel ka dang iai bteng ban ther bom khlem sangeh sha Gaza wat hadien da ki spah bad hajar ngut ki briew ki la iap na ka jingther bom jong ka Israel.
Kumjuh ruh ka UN ka la pyni ia ki jingma bad ki jingktah jong katei ka thma bad ka la kdew ruh ia shibun tylli ki mat ki ban pyni ba ka thma ka long ka jingpynkheiñ aiñ bad ka jingleh kam beaiñ khamtam ha kum kane ka juk ba mynta, ym kum ha ki por mynshwa ba ki ri bapher bapher ki dang kwah ban hiar thma bad ban pynheh ia u pud-u sam jong ki.
La ong ruh ba ka jingma kaba khraw kaba ap ia ka pyrthei mynta ka long ba ioh jia ka thma hapdeng ka United States bad ka Iran. Kane ka wan hadien ba ka Iran ka la dep maham bad byrngem lypa ia ka US ba lada kane ka thma Israel bad Hamas kam kut noh shen, ka Iran kan kput ia ka US kumba leh ki Hamas ia ka Israel. Ka Iran ka la kynnoh ruh ba dei ka US kaba kynshoit bad ai mynsiem ia ka Israel ba kan pynhiar kput bad ban ym sangeh ia ka thma wat haba ki lehnoh Hamas ki la kular ban sangeh noh ia ka thma bad ban pyllait noh ia kiba shah rahbor baroh lada ka Israel ka kular ban sangeh noh ia ka thma.
