Khliehriat, Risaw 29
Ka Lad Rymbai B Sports Club ka la ïoh rah ïa ka nam lahduh jong ka lympung ïalehkai First Division Football Tournament ba la pynïaid da ka East Jaiñtia Hills District Football Association (EJHDFA).
Kane ka nam lahduh ka la wan hadien ba ka Lad Rymbai B SC ka lah ban pynliem noh ïa ka Chiehruphi SYWSC da 1-0 kol ha ka jingïalehkai final kaba la long ha madan Artificial Turf Diengshynrum, Khliehriat ha ka sngi Saitjaiñ.
Haba phai sha ka jing-ïakhun final jong kine ki ar kynhun ka la long kaba itynnad bad mar ïakhaid bha ha kaba ki rangïaleh-kai na baroh ar kynhun, ki la sei lut ïa la ka buit ka bor ban ïakhun tyngeh ban ïohrah ïa ka nam lahduh jong ka lympung ïalehkai First Division jong kane ka aiom.
Ha kane ka jingïaleh-kai, u Dasukwame Dkhar jong ka Lad Rymbai B SC u la ïoh ban thep ïa ka kol ha ka jingïalehkai kaba dang ïaid tang 4 minit jong ka kylla step, watla ka Chiehruphi SYWSC ka la shah thep mar sien sdang ka jingïakhun, hynrei kam shym la duh jingkyrmen bad ka la ïakhun tyngeh ban pashat ïa ka bol sha-khmat da ka jingthmu ban ïoh pynphai ïa katei ka shi kol, hynrei ki rangïalehkai dien ka Lad Rymbai B SC kim shym la ailad satia ïa ki ban ïoh thep kol.
Da kane ka shi kol jong u Dasukwame Dkhar, ka Lad Rymbai B Sports Club ka la ïoh khur syndon ïa ka jingjop bad ban rah ka nam lahduh.
Ha kane ka jingïakhun final la wan sakhi lang da u Deputy Commissioner ka East Jaintia Hills u Abhilash Baranwal, IAS ha ka jingdonlang ki nongïalam bad dkhot jong ka Synjuk kiba kynthup ïa u Working President u Bah J Sutnga bad kiwei kiwei nalor ka jingwan ai jingkyrshan ki paidbah kynthup naduh ki longkmie longkpa, ki samla shynrang bad kynthei haduh ki heprit.
Haba kut ka jingïalehkai, la sam ïa ka khusnam lahduh bad song pisa sha ka kynhun lahduh ka Lad Rymbai B Sports Club kaba la ïoh ïa ka song pisa kaba 30 hajar tyngka katba ka Chiehruphi kaba wan ba ar ka la ïoh ïa ka song pisa kaba 15 hajar tyngka ryngkat ka trophy.
Ïa ka nam ‘Emerging Player’ jong kane ka lympung la ïoh da u Suting Syrti jong ka Chiehruphi SYWSC bad ka nam ‘Best Team’ la ïoh rah da ka Rymbai Synrang Shahkhain Sports Club.
