Itanagar, Risaw:
U Myntri Rangbah jong ka Arunachal Pradesh u Pema Khandu u la ong ba ha kine ki khyndiat sngi jong ka taïew ba la dep, ka la don ka jingkhmih bniah halor ka jingmih bun palat jong ki skul.
Ha kaba ïadei bad kane, na ka liang ka sorkar ka la khmih bniah ïa ki rukom pyntreikam jong kine ki skul na ka bynta ka jingbha bad ka jingmyntoi jong ki khynnah skul. Kumba la sakhi, la ong ba na ka jingkhmih bniah la shem ba ki la don ki skul ki bym don khynnah ban pule hapoh jong ki bad kine ki kynthup ïa ki 400 tylli ha kaba ka sorkar ka la khang syndon ïa ki.
U Myntri Rangbah u la ong ba na ka jingkhmih bniah, la shem ba kiba bun ki skul kim biang lut ha kaba ïadei bad ki rukom pyntreikam.
U Khandu u la ong shuh shuh ba ki skul kiba la mih ha ka jylla ki la dei ban biang lut nadong shadong khamtam ha kaba ïadei bad ka jingbiang ki kamra klas, ki sawdong sawkun jong ka skul, ki surok ki lynti synkien bad kiwei pat ki jingdonkam khnang ban pynsuk ïa ki khynnah pule kiba pynrung kyrteng hapoh jong ki.
Nalor kane u la bynrap shuh shuh da kaba ong ba na kane ka jingleit khmih bniah la lap ba ki la don kum kine ki jait skul ha kaba ym don satia ki khynnah ban leit pule ha kaba ka skul ka la don tang ka jingpynrung kyrteng.
U la ong shuh shuh ba ka jingpyntreikam halor kane ka jingleit khmih bniah ïa ki skul ka dang ïai bteng.
Na ka liang ka sorkar ka la ïaleh ban pynlong ïa baroh ki skul kiba don ha ka jylla ba kin long ki jaka ai jinghikai kiba biang tam na ka bynta ki khynnah kiba leit ban pule.
