Imphal, Risaw:
Ka tnat Veterinary and Animal Husbandry Department ka Manipur ka la shim ïa ka sienjam ban ïaid shakhmat ha kaba ïadei bad ka jingïakhun pyrshah ïa ka jingpang African Swine Fever (ASF) naba kane ka jingpang ka la mih na ki jaka ri sniang kiba don ha ki 7 tylli ki distrik jong ka jylla, kata ha Imphal West, Imphal East, Ukhrul, Bishnupur, Thoubal, Kakching bad Kamjong.
Ïa ka jingsdang nyng-kong jong ka jingpang ASF la lap ba ka la dei na ki san tylli ki jaka ri sniang kiba don ha Lilong Chajing Mamang Leikei, Konthoujam Maning Leikai, Loitang Khunou, Luker bad ha Sairemkhul kiba don ha Imphal West distrik.
Ka jingthoh ba la phah da u Deputy Commissioner (DC) jong ka Imphal West ha kine ki khyndiat sngi ba la leit, ka la ong ba ki jaka ri sniang ïa kiba la shem nyngkong ba la don ki sniang kiba la ïoh ïa ka jingpang ki la shah ñiew ba ki dei ka jaka pdeng ba la sdang ka jingpang bad na kine ki jaka la buh ki jingpyntreikam pyrkhing ha ka jingjngai kaba 1 km na baroh sawdong la ñiew ba ki dei ki jaka ba la shah ktah na ka jingpang ha kaba la ong ba kine ki thaiñ ki la hap hapoh ka jingkhmih bniah.
Ka jingthoh ka la bynrap shuh shuh da kaba ong ban a ka jingdon jong ki sniang kiba pang bad ki ba ïap hadien ka jingshah ktah ha ka jingpang, ki heh jong ka Veterinary and Animal Husbandry Department ha ka jylla ki la buh ki jingmaham bad ki la bthah ïa ki briew ba ki dei ban long kiba husiar.
La hukum ba baroh ki tiar pyndonkam, kynthup ki kali ba la pyndonkam ha ki jaka ba la ri ïa kine ki sniang kiba la pang, ki la dei ban shah khmih bniah bad shah pyrkhing ha ka ban leit na kawei ka jaka sha kawei pat.
Shuh shuh kumba ka long mynta, ka jingdie bad ka jingbam ïa ka doh sniang la khang pyrshah tad haduh ban da pynbna da kumwei pat.
