Jowai, Risaw 29
Ka Khliehiongriang Sports Club ka la khur jingjop ha ka lympung ïalehkai First Division Football Tournament- Chatister Kharkongor Memorial Trophy 2023 bad ka Mukhla Raij ha ka lympung ïalehkai Super Division Football Tournament U Kiang Nangbah Memorial Trophy 2023.
Ïa kine ki lympung ïalehkai la pynïaid da ka West Jaiñtia District Sports Association (WJDSA) ha madan Kiang Nangbah Stadium Ladthadlaboh, Jowai ha ka sngi Saitjaiñ.
Haba phai sha ka jingïakhun ha ka Super Division, ka Mukhla Raij Sports Club ka la lah ban pynliem noh ïa ka Khimusniang Sports Club da 2-0 kol. Ïa kine kol la ïoh ban thep da u Meker Pyrtuh ha ka minit kaba 25 bad u Chandame Suna ha ka minit kaba 90+1.
Ka Mukhla Raij ha ka jingïakhun kaba mar lai sien ka la lah ban kamai haduh 7 dor-thong (point), katba ka Khimusniang ha ka jingïakhun kaba mar lai sien ka la lah ban kamai tang 1 dor-thong.
Haba phai pat sha ka jingïakhun jong ka kyrdan First Division, ka Khliehiongriang Sports Club ka la lah ban pynliem noh ïa ka Luti Tuber SW da 4-2 kol.
Ha ka jingïalehkai, dei ka Luti Tuber SW kaba la ïoh ban pynkhih jar nyngkong ha ka minit kaba 9 ba la thep da u Ribait Lhuid bud sa ka kol jong u Baiahluti Dhar ha ka minit kaba 15.
Watla ka la tam lypa da 2 kol, hynrei kane kam shym la pynduh mynsiem ïa ki rangïalehkai ka Khliehiongriang kiba la ïakhun tyngeh bad dei ha ka minit kaba 50 ba u Same Dkhar u la ïoh ban pynphai shi kol bad ha ka minit ba 73 u Arwan Dkhar u la ïoh ban pynïakhaid da mar 2 kol bad tang hadien 6 minit kata ha ka minit ba 79 ka Khliehiongriang ka la lah ban tam, ha kaba u Founder Passah u la ïoh khyrwit ïa ka kol kaba lai bad ha ka minit kaba 90+1 u Same Dkhar u la khyrwit ïa ka kol kaba ar ka jong u bad kaba saw jong ka kynhun.
Ha ka 30 tarik pat ka jingïakhun ha ka kyrdan First Division kan long hapdeng ka Moosalyngkat Sports Club pyrshah ïa ka Wahiajer Sports Club ha ka por 12 baje mynsngi. Katba ka jingïakhun ha ka Super Division kan long hapdeng ka Shangpung Lumiawmushai Sports Club pyrshah ïa ka Niaw Wasa Sports Club ha ka por 2.00 baje nohphai sngi.
